So‘nggi ikki mavsumni Toshkentning “Obod” futbol klubida o‘tkazgan Alisher Azizov Qirg‘izistonning “Dordoy” klubi bilan 1 yillik kelishuvga erishdi. Bu haqda xabar bergan “Championat.asia” sayti “Dordoy”ning sharoitlari “Obod”nikidan yaxshiroq yoki yo‘q ekaniga, shuningdek, shartnoma shartlariga oydinlik kiritmagan.
Azizov “Obod” futbol klubining Oliy ligaga qadam qo‘yishiga hissa qo‘shdi. Keyin esa shu jamoani Oliy ligada olib qolish uchun jonbozlik ko‘rsatdi. Hujumchi bunga qadar “Paxtakor”, “Buxoro”, “Andijon”, “Qizilqum” kabi klublar sharafini himoya qilgandi.
Alisher Azizov mamlakat Oliy ligasida ilk bor 2010-yilgi mavsum ko‘rinish bergan bo‘lib, “Paxtakor” safida 16 ta o‘yin o‘tkazgan va 5 ta gol urgan. Bu uning eng yaxshi natijasi hisoblanadi. U keyingi olti mavsumidan 4 tasida umuman gol ura olmagan. Yana 2 tasida mavsumni 1 tagina gol bilan yakunlagan.
O‘zbekiston 1-ligasida esa Alisher Azizovning omadi kelgan va to‘purarga aylangan. Shu futbolchi endilikda “Dordoy” klubiga yordam beradi. Qayd etish kerak, Ahmad Ubaydullayev murabbiylik vaqtida Azizov O‘zbekiston yoshlar va olimpiya terma jamoalarida to‘p surgan. U 1990-yilda tug‘ilgan.
Ma’lumot uchun, Alisher Azizov bilan shartnoma imzolagan Bishkekning “Dordoy” klubi 2016-yilgi mavsumni Qirg‘iziston chempionatida “Alay Osh”dan keyin 2-o‘rinda yakulagandi.
Izoh (0)