Футбол бўйича Испания кубогининг чорак финал беллашувларига қуръа ташланди. Унга кўра чемпионлик учун даъвогар сифатида эътироф этилаётган уч клуб бир-бири билан тўқнаш келмади.
«Атлетико» ярим финал масаласини ҳал қилиш учун «Эйбар»га қарши саф тортади. Томонлар шу йилнинг 7 январь куни Ла лига 17-турида дуч келган бўлиб, «Эйбар» майдонида кечган ўйинда «Атлетико» 2:0 ҳисобида зафар қучганди.
Испания кубогининг амалдаги эгаси ҳисобланган «Барселона» «Реал Сосьедад» билан рақиб бўлди. Ла лига 13-турида Луис Энрике жамоаси Сан-Себастьянга ташриф буюрган ва 1:1 ҳисобига имзо чекканди. Ўша учрашувдан кейин «Барселона» бош мураббийи унинг жамоасини «Реал Сосьедад» билан алмаштириб қўйилгандек таассурот қолдирганига иқрор бўлганди.
Мадриднинг «Реал» клуби «Сельта»ни мағлуб этса, ўзи учун ярим финал эшикларини очади. Бу жамоалар мавсумнинг 2-турида тўқнаш келган бўлиб, «Сантьяго Бернабеу»да «Реал» рақибини 2:1 ҳисобида таслим қилганди.
Жуфтликлар орасида энг кучсизи — «Депортиво» — «Алькоркон». Чорак финалга қадар етиб келган жамоалар орасидан фақатгина «Депортиво» қуйи лига вакилига қарши кураш олиб боради.
Чорак финал беллашувлари 17—19 январь ва 24—26 январь кунлари бўлиб ўтади.
Испания кубоги1/4 финал
«Реал Сосьедад» — «Барселона»«Алькоркон» — «Депортиво»«Атлетико» — «Эйбар»«Сельта» — «Реал Мадрид»
Изоҳ (0)