Испаниянинг «Барселона» клуби сардори Андрес Иньеста ФИФА тақдирлаш маросимига у ва жамоадошлари бора олмагани учун «Реал» футболчиларидан узр сўраб чиқди. «Sports.ru» нашрининг қайд этишича, Иньеста тақдирлаш маросимига ташриф буюрган «Қироллик клуби» футболчиларига қўнғироқ қилиб чиққан.
32 ёшли ярим ҳимоячи бу футболчиларнинг шахсий қарори эмаслигини, уларнинг фикри раҳбариятникидан фарқ қилганини тушунтиришга ҳаракат қилган.
Аввалроқ «Реал» футболчилари «Барселона» аъзоларининг Цюрихга ташриф буюрмаганини ҳурматсизлик деб билган ёки бу борада кесатиқ фикрлар билдирганди. «Барселона»нинг ФИФА маросимига ташриф буюрган делегациясига клуб президенти Жозеп Бартомеу раҳбарлик қилган, Лионель Месси, Андрес Иньеста, Луис Суарес ва Ҳерард Пике эса Каталонияда қолганди.
Клуб мазкур ҳолатни олдинда «Атлетик»ка қарши муҳим учрашув кутиб тургани билан изоҳлади. 11 январь куни Каталония клуби ўз майдонида «Атлетик»ни қабул қилади. Бильбаода ўтган дастлабки учрашув «Атлетик»нинг 2:1 ҳисобидаги ғалабаси билан якун топгани учун, каталонияликлар жавоб ўйинига жиддий ҳозирлик кўриши керак эди.
«Чемпионат» эса клуб бош мураббийи Луис Энрикенинг бу борадаги фикрларини тақдим этди.
Тақдирлаш маросимини ўтказиб юбориш ҳар кимнинг шахсий иши. Мураббий сифатида футболчиларни қўллаб-қувватлайман. Мен ҳар қандай ҳолатда ҳам улар билан ҳамфикрман, айниқса, олдинда муҳим учрашув кутиб турган бир маҳалда қарор 100 фоиз тўғри эканини айтаман.Луис Энрике, «Барселона» бош мураббийи
Маълумот учун, ҳужумчи Лионель Месси The Best совринини қўлга киритиши мумкин бўлган уч нафар номзоддан бири сифатида эътироф этилганди. Қолган икки номзод — Криштиану Роналду ва Антуан Гризманн маросимда иштирок этди. Якунда соврин Криштиану Роналдуга насиб қилди.
Иньеста, Суарес ва Пике эса Месси билан қўшилиб, ФИФА талқинига кўра 2016 йилнинг рамзий терма жамоаси сафига киритилганди.
Изоҳ (0)