Ispaniyaning “Barselona” klubi sardori Andres Inyesta FIFA taqdirlash marosimiga u va jamoadoshlari bora olmagani uchun “Real” futbolchilaridan uzr so‘rab chiqdi. “Sports.ru” nashrining qayd etishicha, Inyesta taqdirlash marosimiga tashrif buyurgan “Qirollik klubi” futbolchilariga qo‘ng‘iroq qilib chiqqan.
32 yoshli yarim himoyachi bu futbolchilarning shaxsiy qarori emasligini, ularning fikri rahbariyatnikidan farq qilganini tushuntirishga harakat qilgan.
Avvalroq “Real” futbolchilari “Barselona” a’zolarining Syurixga tashrif buyurmaganini hurmatsizlik deb bilgan yoki bu borada kesatiq fikrlar bildirgandi. “Barselona”ning FIFA marosimiga tashrif buyurgan delegatsiyasiga klub prezidenti Jozep Bartomeu rahbarlik qilgan, Lionel Messi, Andres Inyesta, Luis Suares va Herard Pike esa Kataloniyada qolgandi.
Klub mazkur holatni oldinda “Atletik”ka qarshi muhim uchrashuv kutib turgani bilan izohladi. 11-yanvar kuni Kataloniya klubi o‘z maydonida “Atletik”ni qabul qiladi. Bilbaoda o‘tgan dastlabki uchrashuv “Atletik”ning 2:1 hisobidagi g‘alabasi bilan yakun topgani uchun, kataloniyaliklar javob o‘yiniga jiddiy hozirlik ko‘rishi kerak edi.
“Chempionat” esa klub bosh murabbiyi Luis Enrikening bu boradagi fikrlarini taqdim etdi.
Taqdirlash marosimini o‘tkazib yuborish har kimning shaxsiy ishi. Murabbiy sifatida futbolchilarni qo‘llab-quvvatlayman. Men har qanday holatda ham ular bilan hamfikrman, ayniqsa, oldinda muhim uchrashuv kutib turgan bir mahalda qaror 100 foiz to‘g‘ri ekanini aytaman.Luis Enrike, “Barselona” bosh murabbiyi
Ma’lumot uchun, hujumchi Lionel Messi The Best sovrinini qo‘lga kiritishi mumkin bo‘lgan uch nafar nomzoddan biri sifatida e’tirof etilgandi. Qolgan ikki nomzod — Krishtianu Ronaldu va Antuan Grizmann marosimda ishtirok etdi. Yakunda sovrin Krishtianu Ronalduga nasib qildi.
Inyesta, Suares va Pike esa Messi bilan qo‘shilib, FIFA talqiniga ko‘ra 2016-yilning ramziy terma jamoasi safiga kiritilgandi.
Izoh (0)