Рио—2016 Олимпиадасида Ўзбекистон шарафини ҳимоя қилган 10 нафар боксчининг 6 нафари жаҳон бокс сериясида Uzbek Tigers шарафини ҳимоя қилади. Шулардан уч нафари ўз вазн тоифасини ўзгартиришга мажбур бўлди. Бу ҳақда «Оламспорт» маълумот берди.
Шаҳобиддин Зоиров Рио Олимпиадасининг 52 килограммгача бўлган боксчилар ўртасидаги турнирида иштирок этиб, олтин медални қўлга киритганди. Uzbek Tigers рўйхатида эса у -56 кг вазн тоифасида кўриниш берди.
Унинг қаторида Олимпиаданинг кумуш медали совриндори Бектемир Мелиқўзиев ҳам энди -75 кгда эмас, -81 кг вазн тоифасида рингга кўтарилади. Спорт фестивалида бронза билан тақдирланган Муроджон Аҳмадалиев ҳам бир поғона юқорига ўтиб, -60 кг боксчилар қаторига қўшилган.
Ҳасанбой Дўстматов, Шаҳрам Ғиёсов, Баҳодир Жалолов каби боксчилар ўз вазнини ўзгаришларсиз сақлаб қолишга эришди. Хуршид Тожибоев, Элшод Расулов, Фазлиддин Ғоибназаров ҳамда Рустам Тўлаганов каби чарм қўлқоп усталари Uzbek Tigers таркибидан жой олмаган.
Маълумот учун, Ўзбекистон шарафини ҳимоя қиладиган жамоа 3 февраль куни Хитойнинг China Dragons жамоасига қарши жанг қилади.
Изоҳ (0)