Аслида иш бермайдиган антисептик, витаминлар ва бошқа саломатлик «сирлари»
Соғлом ҳаёт тарзининг барча қабул қилган қоидалари мавжуд — тўғри овқатланиш, спорт билан шуғулланиш, зарарли одатлардан воз кечиш. Бироқ баъзи эскирган саломатлик «сирлари» аслида фактлар билан тасдиғини топмаган янглиш фикрлардир.
Қўл учун антисептикдан фойдаланиш
Агар кун давомида қўлларингизни мунтазам ювиб турсангиз, у ҳолда сизга антисептик керак бўлмайди. Қолаверса, антисептик ҳам оддий совун ва сув ўлдира оладиган бактериялардан кўпроқ бактерия ўлдира олмайди. Баъзи вируслар эса антисептикдан умуман чўчимайди.
Поливитаминлар қабул қилиш
Кўпчилик бунга ҳеч қандай эҳтиёж бўлмаса-да, ҳар куни поливитаминлар қабул қилади. Организмга витаминлар ҳам кераклигини инкор этмаймиз. Уларсиз овқат яхши ўзлаштирилмайди ёки рахит ва синга каби хасталиклар келиб чиқади. Бироқ биз кўпинча витаминларни озиқ-овқат билан етарлича қабул қиламиз, қўшимча қабул қилишга эса зарурат бўлмайди.
Тик турган ҳолда ишлаш
2015 йилда ўтказилган тадқиқотлар тик туриб ишлашнинг ҳеч қандай афзалликларини аниқлай олмади. Тик турганимизда кўпроқ калория йўқотишимиз унинг ягона афзал жиҳатидир. Шунинг учун ортиқча вазндан қутулмоқчи бўлсангиз, тик туриб ишлашни давом эттиришингиз мумкин.
Ҳожатхона ўтиргичи учун бир марталик қопламалардан фойдаланиш
ОИТС ёки герпес каби вируслар жуда беқарор бўлиб, одам организмидан ташқарида яшай олмайди. Қолаверса, тери ҳам турли микробларга қарши самарали тўсиқ ҳисобланади. Шунинг учун жамоат жойлардаги ҳожатхона ўтиргичига ўтирсангиз ҳам бирор хасталикни юқтириб олишингиз даргумон. Бактериялар кесик ёки яра жойлардан организмга қон орқали ўтиши мумкин.
Меваларнинг фақат шарбатини ичиш
Мева ва сабзавотлардан шарбатини сиқиб ола туриб, улардаги барча фойдали озуқавий тўқималарни йўқ қиласиз. Айнан улар бизни тўқ тутади. Шарбатда эса фақат шакар қолади. Шакарнинг юқори таркиби ва оқсил кам бўлган парҳез доимий очлик ҳисси, кайфиятнинг кескин ўзгариши ва дармонсизликка олиб келади. Шунинг учун фақат шарбатли парҳезга ўтишга шошилманг.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
