Сардор Милано «Голос» лойиҳасида 4-ўринни эгаллади

30 декабрь, жума куни Россия Биринчи каналидаги «Голос» лойиҳаси 5-мавсумининг финали бўлиб ўтди. Унда иштирок этган ўзбекистонлик Сардор Милано 4-ўринни эгаллади.

Финални Сардор Милано ўз устози Полина Гагарина билан биргаликда ижро этилган «Навек» қўшиғи билан бошлаб берди.

Кейин эса унинг финалдаги рақиблари — Қайрат Пиримбердиев Дима Билан билан, Александр Панайотов Григорий Лепс билан, Дарья Антонюк Леонид Агутин билан дуэт айтди.

Кейин финал иштирокчилари якка ҳолда қўшиқ куйлади. Сардор «Княз Игорь» операсининг «Улетай на крильях ветра» қисмини ижро этди.

Телетомошабинлар махсус рақамга SMS хабарлар юбориш ва қўнғироқ қилиш орқали финалнинг иккинчи босқичига чиқадиган уч иштирокчини аниқлади. Афсуски, Сардор Милано энг кам овоз йиғгани учун мусобақани 4-ўринда якунлади. У «Қирол шер» мультфильмидаги Circle of Life қўшиғи билан лойиҳадаги иштирокини якунлади. «Голос»нинг шу мавсумида Полина Гагарина жамоасида чорак финалгача етиб келган, Тошкентдаги ресторанда қўшиқ куйловчи маврикийлик Хенсли Пойнен мусиқа чалиб, Сардорга жўр бўлиб турди.

Қолган уч иштирокчи бир мартадан қўшиқ айтди. Телетомошабинларнинг навбатдаги овоз беришидан сўнг қирғизистонлик Қайрат Пиримбердиев 3-ўринни олди.

Шундан сўнг телетомошабинлар қолган икки иштирокчига овоз беришди. 53 фоиздан ортиқ овоз олган Дарья Антанюк «Голос»нинг бешинчи мавсуми ғолибига айланди. Унга ғолиблик статуэткасидан ташқари 1 миллион рублга сертификат берилди.

Эслатиб ўтамиз, Сардор Милано биринчи босқичдан кейин Дима Биланни ўзига устоз сифатида танлаганди. Аммо иккинчи босқичда Милано Оксана Казакова билан дуэт айтгач, Билан Оксанани ўз жамоасида қолдирди. Ўзбекистонлик хонандани Полина Гагарина сақлаб қолди. Чорак финалда эса телетомашабинларнинг овози Сардорни ярим финалга олиб чиққанди. Ярим финалда эса Полина ҳам, телетомошабинлар ҳам уни финалга муносиб кўрганди.

Сардор 2015 йилда Россиядаги бошқа бир лойиҳа — «Главная сцена»да қатнашиб, унда ғолибликни қўлга киритган.

Маълумот учун, 2014 йили «Голос»да қатнашган ўзбекистонлик Наргиз Зокирова 2-ўринни эгаллаганди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.