Ўзбекистон ва Афғонистон ҳукумати вакиллари савдо, транспорт ҳамда энергетика соҳаларидаги ҳамкорликни ривожлантиришни муҳокама этди

Тошкентдаги Халқаро ҳамкорлик марказида Савдо, транспорт ва энергетика бўйича Ўзбекистон — Афғонистон ҳукуматлараро комиссиясининг навбатдаги мажлиси бўлиб ўтди. Бу ҳақда ЎзА хабар бермоқда. 

Тадбирда икки мамлакатнинг ташқи иқтисодий алоқалар, савдо-саноат, сармоя, энергетика, нефть-газ, божхона, транспорт ва транспорт коммуникациялари, темир йўл, авиаташув, машинасозлик, электр техникаси, қурилиш, қишлоқ хўжалиги, озиқ-овқат саноати, фармацевтика соҳаларида фаолият кўрсатаётган вазирлик ва идоралари раҳбар ҳамда вакиллари иштирок этди. 

Ўзбекистон Республикаси ташқи иқтисодий алоқалар, инвестициялар ва савдо вазири, комиссия ҳамраиси Элёр Ғаниев мамлакатлар ўртасидаги савдо, иқтисодиёт, транспорт ва энергетика соҳаларидаги ҳамкорлик изчил ривожланиб бораётганини таъкидлади. 

Ўзбекистондан Афғонистонга электр энергияси, мева-сабзавотлар, нефть маҳсулотлари, минерал ўғитлар экспорт қилинмоқда. 2016 йилнинг январь—октябрь ойлари якунларига кўра ўзаро товар айирбошлаш ҳажми 429 миллион долларни ташкил этди. Ўзбекистонда афғонистонлик сармоядорлар иштирокида тузилган 70 корхона фаолият кўрсатмоқда. 

Афғонистон Ислом Республикаси Президентининг инфратузилмани ривожлантириш бўйича катта маслаҳатчиси, комиссия ҳамраиси Ҳумоюн Қаюмий иқтисодиётнинг турли соҳаларида ҳамкорликни ривожлантириш бўйича фойдаланилмаган имкониятлар кўп эканини таъкидлади. 

Мажлисда ўзаро савдо ҳажмини янада ошириш ва номенклатурасини кенгайтириш масалалари ҳақида сўз юритилди. Савдо, энергетика, транспорт ва транспорт коммуникациялари, транзит, қишлоқ хўжалиги, темир йўл, машинасозлик каби соҳалардаги алоқаларни ривожлантириш, Афғонистонга электр, маиший, қишлоқ хўжалиги техникаси ва ускуналарини экспорт қилиш, биргаликда ўзаро фойдали лойиҳаларни ишлаб чиқиш ва амалга ошириш масалалари муҳокама қилинди. 

Афғонистон делегацияси Ўзбекистонда хорижий инвестицияларни жалб қилиш учун яратилаётган шароитлар, экспорт салоҳияти, индустриал зоналардаги имкониятлардан хабардор қилинди. Делегация аъзолари қатор вазирлик ва идораларида учрашувлар ўтказди, саноат корхоналари фаолияти билан танишди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.