Uber такси сервиси Volvo ҳайдовчисиз автомобилларининг Сан-Францискода синов режимидаги қатновини йўлга қўйди. Бу ҳақда The Verge маълум қилди, деб ёзади TJournal.
14 декабрдан бошлаб тизим тасодифий тарзда UberX сервиси фойдаланувчиларини танлаб, уларга Volvo XC90 автомобилининг ҳайдовчисиз версиясини ажратади. Хавфсизлик учун машинада Uber’нинг икки ходими ҳам бўлиб, улар олдинги ўриндиқларда жойлашади.
13 декабрь кунги қатновларда бир неча қизиқарли ҳолатлар юз берди. Масалан, ресторанга чақирилган машина йўл чеккасида эмас, қоқ ўртасида тўхтади. Бошқа вазиятда эса қўшни ҳаракатланиш йўналиши бўш бўлишига қарамай, машина йўлнинг тирбанд қаторига туриб олди. Натижада ҳайдовчи машинани бошқа йўналишга ўзгартиришга мажбур бўлди.
Компания автомобилларнинг амалдаги федерал ва давлат қонунлари талабларига мос эканлигига урғу бераётган бўлса-да, Uber ҳайдовчисиз машиналарни синовдан ўтказиш учун Калифорния транспорт воситалари департаментидан рухсат олмаган.
Департамент ҳайдовчисиз автомобиллар ишлаб чиқарувчиларидан штат ҳудудида синовдан ўтказиш ҳақида ҳукуматга маълум қилишни талаб қилади.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)