Хитойда «телекоммуникация фирибгарлиги»да гумон қилинган 100 дан ортиқ киши қўлга олинди

Жанубий Хитойнинг Гуанси-Чжуан автоном тумани полицияси Биньян уездидаги 2 мингдан ортиқ полициячи ва учувчисиз учиш қурилмалари сафарбар этилган махсус операция чоғида 109 кишини қўлга олди. Улар «телекоммуникация фирибгарлиги» деб ном олган жиноятларда гумон қилинмоқда, дея хабар беради «ТАСС».

«Синьхуа» агентлигига кўра, икки ҳафта давомида минтақа ҳуқуқ-тартибот идоралари шунга ўхшаш жиноятларда гумон қилиб, 186 кишини қўлга олди. Улардан 200 компьютер, 300 мобил телефони, 600 дан ортиқ банк картаси ва бошқа қурилмалар мусодара қилинди.

Хитой ОАВ ҳуқуқбузарлар алдов йўли билан телефон ёки интернет ёрдамида пулларни қўлга киритадиган жиноятларни «телекоммуникация фирибгарлиги» деб атайди. Бу жараёнда улар ўзларини банк ёки инвестиция фирмалари ходимлари сифатида таништиради.

Хитойда бундай кимсаларга чув тушиб алданганлар ҳуқуқ-тартибот идоралари ҳаракатсизлигига қарши намойишлар ўтказиши ёки жонига қасд этиши бот-бот рўй бермоқда.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.