«Маша ва маймоқ» мультфильмининг эпизодларидан бири YouTube’да Аделнинг Hello клипидан кўпроқ кўрилди

Россиялик ижодкорлар томонидан ишланган «Маша ва маймоқ» мультфильмининг эпизодларидан бири YouTube’да энг кўп кўрилган видеолар рўйхатида 6-ўринга кўтарилди. Бу ҳақда TJournal хабар бермоқда.

YouTube видеохостингига 2012 йилда юкланган «Маша плюс каша» («Маша ва бўтқа») серияси 1,8 миллиард мартадан ортиқ кўрилди ва ушбу кўрсаткич бўйича британиялик таниқли қўшиқчи Аделнинг Hello номли клипидан ўзиб кетди. Аделнинг мазкур клипи 2015 йилнинг ноябрь ойида YouTube’га жойланганди.

«Маша ва бўтқа» сериясини инглиз, немис, француз, испан, португал, хитой ва украин тилларида ҳар куни 3 миллион фойдаланувчи кўради.

«Маша ва маймоқ» мультфильмининг биринчи премьераси 2009 йили бўлиб ўтган ва ҳозирда бутун дунёга машҳур. Мультфильм намойиши ҳуқуқини кўплаб компаниялар, жумладан, Netflix, France TV, Sony Music сотиб олган.

Мультфильм 25 тилга таржима қилинган бўлиб, дунё бўйлаб 100 та мамлакатда намойиш этилади. Kidz Global’нинг маълумотига кўра, мазкур мультфильмни Индонезияда 95 фоиз, Италияда 88 фоиз болалар билади.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.