Rossiyalik ijodkorlar tomonidan ishlangan “Masha va maymoq” multfilmining epizodlaridan biri YouTube’da eng ko‘p ko‘rilgan videolar ro‘yxatida 6-o‘ringa ko‘tarildi. Bu haqda TJournal xabar bermoqda.
YouTube videoxostingiga 2012-yilda yuklangan “Masha plyus kasha” (“Masha va bo‘tqa”) seriyasi 1,8 milliard martadan ortiq ko‘rildi va ushbu ko‘rsatkich bo‘yicha britaniyalik taniqli qo‘shiqchi Adelning Hello nomli klipidan o‘zib ketdi. Adelning mazkur klipi 2015-yilning noyabr oyida YouTube’ga joylangandi.
“Masha va bo‘tqa” seriyasini ingliz, nemis, fransuz, ispan, portugal, xitoy va ukrain tillarida har kuni 3 million foydalanuvchi ko‘radi.
“Masha va maymoq” multfilmining birinchi premyerasi 2009-yili bo‘lib o‘tgan va hozirda butun dunyoga mashhur. Multfilm namoyishi huquqini ko‘plab kompaniyalar, jumladan, Netflix, France TV, Sony Music sotib olgan.
Multfilm 25 tilga tarjima qilingan bo‘lib, dunyo bo‘ylab 100 ta mamlakatda namoyish etiladi. Kidz Global’ning ma’lumotiga ko‘ra, mazkur multfilmni Indoneziyada 95 foiz, Italiyada 88 foiz bolalar biladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)