Жингалак сочлар учун энг яхши соч турмаклари
Жингалак сочлар – табиатнинг ҳақиқий совғаси. Агар сиз жингалак соч билан туғилган бўлсангиз – ниҳоятда омадлисиз! Текис соч эгалари сизга қанчалик ҳавас қилишини ва сочларини сизникидек жингалак қилиш учун қанчалик зўр беришини ҳатто тасаввур ҳам қилолмайсиз.
Шубҳасиз, кўпчилик бунга эътироз билдиради, яъни, жингалак сочлар ҳам укладка қилинмаса ҳар томонга тўзғиб кетиши борасида. Бу муаммони ҳал қилишга жингалак сочлар учун укладка талаб қилинмайдиган ва тўғри танланган соч турмаклари ёрдам беради.
Жингалак сочлар учун, укладка талаб қилинмайдиган, замонавий соч турмагини танлашда, аввало сочнинг узунлиги ва табиатини ҳисобга олиш зарур. Узун зулфлар «арслон ёли»га ўхшаб кўринмаслиги учун, кўп қатламли соч турмагини танлаган маъқул. Бир неча қатламлар туфайли сочлар дона-дона ва енгил сочларга айланади. Соч турмаги нозик ва мукаммал бўлиб кўринади.
Каскад – бу ҳаддан ташқари жингалак бўлган сочлар учун жуда мос тушадиган соч кесиш туридир. Бошдаги ҳамма соч кокиллари тепадан пастга қараб, бора-бора энг калтадан узунга ўтувчи қатламлар қилиб кесилади. Натижада, сочдаги ҳаддан зиёд ҳажм ва оғирлик йўқолади. Соч турмаги ҳажми катталигича қолади, лекин анча табиий ва кўркам кўринади. Сочлар майинлашади ва осон таралади. Каскад ингичка ва тўлқинсимон сочларни ҳам ҳажмли ва қуюқ қилиб кўрсатади. Энг асосийси, каскад укладка талаб қилмайди!
Каре – сочни елкагача кесишнинг энг яхши вариантидир. Каре бироз тўлқинсимон сочларда ҳам, қуюқ жингалак сочларда ҳам жуда шинам ва назокатли кўринади. Классик турдаги каре анча жиддий кўрсатади ва ёши катта аёлларга мос келади. Градуировка қилинган каре эса нозли ва ёқимтой кўрсатади, шунинг учун ёшларбоп вариант ҳисобланади. Бундан ташқари, градуировка ёрдамида сочларга ҳажм ва енгиллик қўшиш мумкин. Каре, айниқса, юз тузилиши ингичка ва учбурчаксимон шаклдаги қизларга, сочининг пастки қисмига ҳажм берилгани учун, жуда ярашади.
Боб – сочларни, чёлкали ёки чёлкасиз, ўртача тўлқинсимон кесишнинг энг замонавий вариантидир. Боб каредан, энсадаги сочларнинг калта ҳамда ҳажмлироқлиги ва юзга ён томондан жилвали тушиб турувчи сочларнинг узунроқлиги билан фарқ қилади. Тўлқинсимон сочларга узунлиги ияккача келадиган, жингалакларни майин ва дона-дона қиладиган градуировкали боб жуда мос тушади. Энсадаги калта сочлар бўйинни нафис қилиб очади, ён томондаги узун сочлар эса юзни хушбичим қилиб кўрсатади.
