МДҲ миссияси: Сайлов кампанияси очиқ рақобат ва юқори ташкилий даражада ўтмоқда
29 ноябрь, сешанба куни Ўзбекистон Республикаси Президенти сайловини ёритиш бўйича Республика матбуот марказида МДҲ миссияси кузатувчиларининг Ўзбекистон Президенти сайловига тайёргарлик кўриш ва уни ўтказиш бўйича олиб борилган кузатувлар бўйича брифинги ташкил этилди. Бу ҳақда «Дарё»га марказ мутасаддилари хабар берди.
Унда миссия вакиллари Ўзбекистон Президенти сайловига тайёргарлик кўриш ва уни ўтказиш бўйича олиб борилган кузатувлар жараёни тўғрисида оралиқ ҳисоботни эълон қилди. Ушбу муддат миссия кузатувни бошлаган 17 ноябрдан 28 ноябргача оралиқни қамраб олди.
Миссиянинг фикрича, «умуман, сайлов кампанияси сокин атмосферада, очиқ рақобат ва юқори ташкилий даражада ўтмоқда».
29 ноябрь ҳолатига кўра миссия таркибида Озарбайжон, Беларусь, Қозоғистон, Қирғизистон, Россия, Тожикистон, Туркманистон ва МДҲ Ижроия қўмитаси вакилларидан иборат 70 нафардан зиёд кузатувчилар аккредитациядан ўтган.
Миссия аъзолари Марказий сайлов комиссияси, Олий Суд, Бош прокуратура, Ички ишлар вазирлиги, шунингдек, ЕХҲТ ДИИҲБ миссияси ҳамда президентликка номзодларини илгари сурган барча сиёсий партиялар сайловолди штаблари раҳбарияти билан учрашувлар ўтказди.
«Умуман, миссия фикрича, ташвиқот жараёни қонунчиликка риоя этилган ҳолда кечмоқда, президентликка номзодларга ўз сайлов дастурларини тақдим этиш ва сайловчилар билан учрашиш учун тенг шароитлар яратилган. МСК сайлов жараёнининг очиқлиги ва шаффофлигини таъминлаш учун ОАВ имкониятидан самарали фойдаланмоқда», — деди МДҲ Ижроия қўмитаси бўлим бошлиғи Евгений Слобода.
