29-noyabr, seshanba kuni O‘zbekiston Respublikasi Prezidenti saylovini yoritish bo‘yicha Respublika matbuot markazida MDH missiyasi kuzatuvchilarining O‘zbekiston Prezidenti sayloviga tayyorgarlik ko‘rish va uni o‘tkazish bo‘yicha olib borilgan kuzatuvlar bo‘yicha brifingi tashkil etildi. Bu haqda “Daryo”ga markaz mutasaddilari xabar berdi.
Unda missiya vakillari O‘zbekiston Prezidenti sayloviga tayyorgarlik ko‘rish va uni o‘tkazish bo‘yicha olib borilgan kuzatuvlar jarayoni to‘g‘risida oraliq hisobotni e’lon qildi. Ushbu muddat missiya kuzatuvni boshlagan 17-noyabrdan 28-noyabrgacha oraliqni qamrab oldi.
Missiyaning fikricha, “umuman, saylov kampaniyasi sokin atmosferada, ochiq raqobat va yuqori tashkiliy darajada o‘tmoqda”.
29-noyabr holatiga ko‘ra missiya tarkibida Ozarbayjon, Belarus, Qozog‘iston, Qirg‘iziston, Rossiya, Tojikiston, Turkmaniston va MDH Ijroiya qo‘mitasi vakillaridan iborat 70 nafardan ziyod kuzatuvchilar akkreditatsiyadan o‘tgan.
Missiya a’zolari Markaziy saylov komissiyasi, Oliy Sud, Bosh prokuratura, Ichki ishlar vazirligi, shuningdek, YeXHT DIIHB missiyasi hamda prezidentlikka nomzodlarini ilgari surgan barcha siyosiy partiyalar saylovoldi shtablari rahbariyati bilan uchrashuvlar o‘tkazdi.
“Umuman, missiya fikricha, tashviqot jarayoni qonunchilikka rioya etilgan holda kechmoqda, prezidentlikka nomzodlarga o‘z saylov dasturlarini taqdim etish va saylovchilar bilan uchrashish uchun teng sharoitlar yaratilgan. MSK saylov jarayonining ochiqligi va shaffofligini ta’minlash uchun OAV imkoniyatidan samarali foydalanmoqda”, — dedi MDH Ijroiya qo‘mitasi bo‘lim boshlig‘i Yevgeniy Sloboda.
Izoh (0)