Британия авиацион ҳодисаларни тергов қилиш бюроси (AAIB) Колумбияда рўй берган авиаҳалокатнинг сабабларини аниқлашга ёрдам бериш мақсадида ўз мутахассисларини йўллайди. Бу ҳақда, идора баёнотига таяниб, «ТАСС» хабар бермоқда.
«Авиацион ҳодисаларни тергов қилиш бюроси Колумбияга инспекторлар жамоасини йўллайди. Улар Колумбия фуқаро авиацияси бошқармасига Медельиндаги авиацион ҳодисани текширишда ёрдам беради», — дейилади баёнотда.
Лайнер 29 ноябрга ўтар кечаси Ла-Уньон шаҳри яқинида ҳалокатга учради. Ҳаво кемаси бортида 72 йўловчи ҳамда 9 нафар экипаж аъзоси бўлган. Самолёт ичида футбол бўйича Бразилия А сериясида ҳаракат қилаётган «Шапекоэнсе» клубининг 27 футболчиси бўлгани ҳам хабар қилинганди.
«Шапекоэнсе» футболчилари 1 декабрь куни Копа Судамерикано – Жанубий Америка минтақаси клублари ўртасидаги Копа Либертадорес турниридан кейин нуфузи жиҳатдан иккинчи ўринда турадиган мусобақаси доирасида «Атлетико Насьональ» клубига қарши майдонга тушиши керак бўлган.
Сўнгги маълумотларга кўра, Колумбиядаги авиаҳалокат оқибатида қурбон бўлганлар сони 75 кишига етди.
Бразилияда авиаҳалокат қурбонлари хотирасига мотам эълон қилинди.
Изоҳ (0)