Россия мезбонлигида ўтадиган футбол бўйича Конфедерациялар Кубоги—2017 нинг мукофот жамғармаси 20 миллион долларни ташкил қилади.

«Чемпионат» маълумотига кўра, турнирга ташриф буюраётган ҳар бир жамоа 1,7 миллион долларга эга чиқади. 4-ўринни олганлиги учун эса 2,5 миллион доллар ваъда қилинган. Мос равишда 3-ўринга 3 миллион, 2-ўринга 3,6 миллион, ғолибга эса 4,1 миллион насиб қилади.

2017 йилнинг 17 июнь санасида старт олиб, 2 июлига қадар давом этадиган мусобақага қуръа ташлаш маросими бугун — 26 ноябрь куни Қозон шаҳрида бўлиб ўтади. Турнирда Россия термаси мезбон сифатида, Германия эса амалдаги жаҳон чемпиони сифатида иштирок этади. Шунингдек, ўз қитъасининг чемпионлари сифатида Чили, Мексика, Португалия, Австралия, Янги Зеландия ташриф буюради. Африка Миллатлар Кубогининг февраль ойида аниқланадиган ғолиби улар қаторига қўшилади.