Президентликка сайланган Дональд Трамп ва унинг оила аъзоларини қўриқлаш билан шуғулланувчи АҚШ Махфий хизмати ходимларини жойлаштириш учун Нью-Йоркда жойлашган, республикачига тегишли Trump Tower осмонўпар биносининг алоҳида қаватини ижарага олишни режалаштирмоқда. Бу ҳақда 25 ноябрь, жума куни CNN телекомпанияси маълум қилди, деб ёзади «ТАСС».
Телекомпаниянинг маълум қилишича, Трамп ва унинг яқинлари Манхэттен марказида жойлашган ушбу 58 қаватли бинода ҳозир бўлган пайтда уларнинг хавфсизлигини кечаю кундуз таъминлаш учун 100 дан ортиқ Махфий хизмат ходими керак бўлади.
Trump Tower’ни ташқи томондан қўриқлашни Нью-Йорк полицияси амалга оширади, уларнинг сони 300 кишига етказилиши мумкин.
Ўртача майдони 1,4 минг квадрат метр бўлган қаватлардан бирининг ижараси АҚШ Миллий хавфсизлик вазирлигига бўйсунувчи алоҳида бошқарма ҳисобланган Махфий хизматга йилига тахминан 1,5 миллион долларга тушиши мумкин. Шу тариқа бино ижараси учун тўлов федерал бюджетдан сайланган президентга тегишли Trump Organization компаниясига келиб тушади.
Олдинроқ Дональд Трамп ҳамда унинг оила аъзолари хавфсизлигини таъминлаш учун Нью-Йорк шаҳри ҳар куни 1 миллион доллар атрофида сарфлаши хабар қилинганди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)