Prezidentlikka saylangan Donald Tramp va uning oila a’zolarini qo‘riqlash bilan shug‘ullanuvchi AQSh Maxfiy xizmati xodimlarini joylashtirish uchun Nyu-Yorkda joylashgan, respublikachiga tegishli Trump Tower osmono‘par binosining alohida qavatini ijaraga olishni rejalashtirmoqda. Bu haqda 25-noyabr, juma kuni CNN telekompaniyasi ma’lum qildi, deb yozadi “TASS”.
Telekompaniyaning ma’lum qilishicha, Tramp va uning yaqinlari Manxetten markazida joylashgan ushbu 58 qavatli binoda hozir bo‘lgan paytda ularning xavfsizligini kechayu kunduz ta’minlash uchun 100 dan ortiq Maxfiy xizmat xodimi kerak bo‘ladi.
Trump Tower’ni tashqi tomondan qo‘riqlashni Nyu-York politsiyasi amalga oshiradi, ularning soni 300 kishiga yetkazilishi mumkin.
O‘rtacha maydoni 1,4 ming kvadrat metr bo‘lgan qavatlardan birining ijarasi AQSh Milliy xavfsizlik vazirligiga bo‘ysunuvchi alohida boshqarma hisoblangan Maxfiy xizmatga yiliga taxminan 1,5 million dollarga tushishi mumkin. Shu tariqa bino ijarasi uchun to‘lov federal budjetdan saylangan prezidentga tegishli Trump Organization kompaniyasiga kelib tushadi.
Oldinroq Donald Tramp hamda uning oila a’zolari xavfsizligini ta’minlash uchun Nyu-York shahri har kuni 1 million dollar atrofida sarflashi xabar qilingandi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)