Ўзбекистон Республикаси Президентлигига Ўзбекистон «Миллий тикланиш» демократик партиясидан номзод Сарвар Отамуратовнинг Наманган вилоятидаги сайловчилар ва кенг жамоатчилик билан учрашуви бўлиб ўтди. Учрашув вилоятнинг барча туман ва шаҳарларидаги сайловчилар билан онлайн видеоконференция орқали мулоқот тарзида ташкил этилди. Бу ҳақда «Дарё»га партия вилоят кенгаши матбуот хизмати маълум қилди.
Номзоднинг Наманган вилоятидаги ишончли вакили Одилжон Мамадалиев иштирокчиларга Сарвар Отамуратовни таништирар экан, унинг таржимаи ҳолига батафсил тўхталиб ўтди. Шундан сўнг Ўзбекистон Республикаси Президентлигига номзод Сарвар Отамуратов сайловолди Дастури юзасидан нутқ сўзлади.
Номзод таъкидлаганидек, сайловолди дастурида халқаро миқёсда эътироф этилган ислоҳотлар бардавомлигини таъминлаш, тарихий, маданий, бой маънавий-ахлоқий қадриятлар ва анъаналар асосида жамиятда юксак ҳуқуқий ва сиёсий маданиятни мустаҳкамлаш ҳамда маънавий юксалишга эришиш масалаларига устувор аҳамият қаратилган. Маданий ёдгорликлар умумжаҳон аҳамиятига молик эканлиги эътироф этилиб, шаҳарларнинг миллий қиёфасини сақлаб қолишда самарали чора-тадбирларни амалга ошириш, архитектура ёдгорликларини асраб-авайлаш, қайта таъмирлашга кўмаклашиш асосий вазифа эканлиги қайд этилган.
Наманган вилоятида 118 та касб-ҳунар коллежи ва академик лицей мавжуд бўлиб, уларнинг қарийб 70 фоизи қишлоқ жойларида жойлашган. Бошқача айтганда, бугунги кунда ўрта-махсус касб-ҳунар таълими муассасаларида таҳсил олаётган ўқувчиларнинг 70 минг нафарга яқинини чекка қишлоқларда яшовчи ўғил-қизлар ташкил этади. Шу нуқтаи назардан, дастурда олис ва етиб бориш қийин бўлган жойлардаги касб-ҳунар коллежлари ва академик лицей ўқувчилари учун имтиёзли транспорт қатновини таъминлаш вазифаси илгари сурилган.
Шунингдек, дастурда хорижий мамлакатлар кутубхона, архив ва музейларида сақланаётган моддий бойликларни Ўзбекистонга қайтариш, оила, мерос, уй-жой даъвоси ва маиший турмуш манбаида туғиладиган низоларни судгача ҳал этиш тизимини ривожлантириш, туристик фаолият манзилларида, халқаро аэропортларда, вокзалларда кўрсатилаётган сервис ва хизматлар сифатини яхшилаш, озиқ-овқат хавфсизлигини таъминлашга қаратилган давлат дастурини қабул қилиш, миллий ахборот хавфсизлигини таъминлаш каби бир қатор устувор вазифалар белгиланган.
Номзоднинг сайловолди дастури учрашув иштирокчиларида катта қизиқиш уйғотди. Уни қўллаб-қувватлаб, Наманган тумани «Саломатлик маркази» директори Саломатхон Арзиматова, Наманган шаҳар транспорт ва ахборот технологиялари касб-ҳунар коллежи ўқитувчиси Юлдуз Раҳимова ва бошқалар сўзга чиқди.
Учрашув сўнгида С. Отамуратов иштирокчиларнинг бир қатор саволларига жавоб берди.
Изоҳ (0)