Самвел Бабаян Ўзбекистон терма жамоасининг Иордания ва Жанубий Кореяга қарши учрашувларига Вадим Афонинни чақирди

Футбол бўйича Ўзбекистон терма жамоаси устози Самвел Бабаян бошчилигидаги мураббийлар штаби миллий терманинг Иорданияга қарши ўртоқлик ҳамда Жанубий Кореяга қарши ЖЧ–2018 турнирига саралаш босқичи 5-тур учрашуви учун таркибини эълон қилди. Бу ҳақда ЎФФ матбуот хизмати хабар бермоқда.

Бўлажак учрашувларга жалб этилган футболчилар орасида Россиянинг «Оренбург» сафида тўп сураётган Вадим Афонин ҳам бор.

• Бабаян Россия чемпионатида тўп сураётган ўзбекистонлик Вадим Афониннинг паспорти юридик кучга эга бўлса, уни миллий термага чақиришга тайёр

Дарвозабонлар: Александр Лобанов («Пахтакор»), Игнатий Нестеров («Локомотив»), Элдор Суюнов («Насаф»).

Ҳимоячилар: Егор Кримец («Бейжинг Гоан» – Хитой), Анзур Исмоилов («Чангчун Ятай» – Хитой), Ислом Тўхтахўжаев («Локомотив»), Виталий Денисов («Локомотив» Москва), Даврон Ҳошимов («Пахтакор»), Станислав Андреев («Пахтакор»), Отабек Шукуров («Бунёдкор»).

Ярим ҳимоячилар: Одил Аҳмедов («Краснодар» – Россия), Азиз Ҳайдаров («Аш-Шабоб» – БАА), Жавоҳир Соҳибов («Пахтакор»), Саламат Қуттибоев («Бухоро»), Одил Ҳамробеков («Насаф»), Вадим Афонин («Оренбург» – Россия), Сардор Рашидов («Ал-Жаиш» – Қатар), Жалолиддин Машарипов («Пахтакор»), Элдор Шомуродов («Бунёдкор»), Сервер Жепаров («Локомотив»), Жамшид Искандеров («Пахтакор»), Марат Бикмаев («Локомотив»).

Ҳужумчилар: Игорь Сергеев («Бейжинг Гоан» – Хитой), Александр Гейнрих («Ордабаси» – Қозоғистон).

Ўзбекистон миллий терма жамоаси Жанубий Кореяга қарши 15 ноябрь куни бўлиб ўтадиган сафардаги ўйинга бугун, 4 ноябрдан тайёргарликни бошлайди. Ушбу йиғин доирасида самвел Бабаян шогирдлари 10 ноябрь куни Тошкентда Иордания термасига қарши ўртоқлик учрашуви ўтказади.

Хабарда қайд этилишича, Ўзбекистон ёшлар терма жамоаси аъзолари Остон Ўрунов ҳамда Жасурбек Яхшибоев миллий терма жамоага ёш футболчиларни тайёрлаш дастури доирасида бош жамоа билан бирга машғулотларда иштирок этиш учун таклиф қилинди.