Ўзбекистон Бадиий академияси Марказий кўргазмалар залида «Бизнинг мерос» туркумидаги навбатдаги бадиий кўргазмада Ўзбекистон халқ рассоми Неъмат Қўзибоев ижод намуналари мухлислар эътиборига ҳавола этилди, деб ёзади ЎзА.
Неъмат Қўзибоев санъат оламига ХХ асрнинг 50-йилларида кириб келган. Олий таълим даргоҳида таҳсил олаётган кезлариданоқ ўз асарлари билан кўргазмаларда фаол қатнаша бошлаган. Ижодий фаолиятини бадиий таълим билан чамбарчас боғлаган устоз-мусаввир умрининг сўнгги давригача Республика рассомлик коллежи, Камолиддин Беҳзод номидаги Миллий рассомлик ва дизайн институтида рангтасвир йўналишида педагоглик қилди.
Санъатшуносларнинг фикрича, устоз-мусаввир ижоди борлиқни борича, аслича ифодалагани билан аҳамиятлидир. Унинг асарларида манзара, жанрли композиция, портрет йўналиши устувор ўрин эгаллайди. Рассомнинг туркум картиналари Ўзбекистон ва хорижий мамлакатлардаги музейлар, галереялар, шахсий коллекциялардан ўрин олган.
Кўргазмада мусаввирнинг Ўзбекистон Тасвирий санъат галереяси, Бадиий кўргазмалар дирекцияси, Алишер Навоий номидаги давлат адабиёт музейида сақланаётган асарлари санъат ихлосмандлари эътиборига ҳавола этилган. «Чўпонлар орасида», «Салқин тонг», «Куз», «Шоҳимардонга йўл», «Оқтош тоғларида» каби элликка яқин картиналари кўргазма иштирокчиларида катта қизиқиш уйғотмоқда.
Изоҳ (0)