“Bizning meros” turkumidagi ko‘rgazmada O‘zbekiston xalq rassomi Ne’mat Qo‘ziboyev ijod namunalari namoyish etildi

O‘zbekiston Badiiy akademiyasi Markaziy ko‘rgazmalar zalida “Bizning meros” turkumidagi navbatdagi badiiy ko‘rgazmada O‘zbekiston xalq rassomi Ne’mat Qo‘ziboyev ijod namunalari muxlislar e’tiboriga havola etildi, deb yozadi O‘zA.

Ne’mat Qo‘ziboyev san’at olamiga XX asrning 50-yillarida kirib kelgan. Oliy ta’lim dargohida tahsil olayotgan kezlaridanoq o‘z asarlari bilan ko‘rgazmalarda faol qatnasha boshlagan. Ijodiy faoliyatini badiiy ta’lim bilan chambarchas bog‘lagan ustoz-musavvir umrining so‘nggi davrigacha Respublika rassomlik kolleji, Kamoliddin Behzod nomidagi Milliy rassomlik va dizayn institutida rangtasvir yo‘nalishida pedagoglik qildi.

San’atshunoslarning fikricha, ustoz-musavvir ijodi borliqni boricha, aslicha ifodalagani bilan ahamiyatlidir. Uning asarlarida manzara, janrli kompozitsiya, portret yo‘nalishi ustuvor o‘rin egallaydi. Rassomning turkum kartinalari O‘zbekiston va xorijiy mamlakatlardagi muzeylar, galereyalar, shaxsiy kolleksiyalardan o‘rin olgan.

Ko‘rgazmada musavvirning O‘zbekiston Tasviriy san’at galereyasi, Badiiy ko‘rgazmalar direksiyasi, Alisher Navoiy nomidagi davlat adabiyot muzeyida saqlanayotgan asarlari san’at ixlosmandlari e’tiboriga havola etilgan. “Cho‘ponlar orasida”, “Salqin tong”, “Kuz”, “Shohimardonga yo‘l”, “Oqtosh tog‘larida” kabi ellikka yaqin kartinalari ko‘rgazma ishtirokchilarida katta qiziqish uyg‘otmoqda.