Рамзан Қодиров Ливияда «Михаил Чеботарев» танкери экипажи озод қилинганини айтди

Чеченистон раҳбари Рамзан Қодиров Ливияда 2015 йилда қўлга олинган, Россиянинг «Михаил Чеботарев» танкерида хизмат қилган уч нафар денгизчи озод этилганини маълум қилди. Бу ҳақда «Ведомости» хабар бермоқда.

«Россиянинг 2015 йил 16 сентябрь куни Ливияда қўлга олинган ‘Михаил Чеботарев’ танкери экипажи озодликда. Капитан Андрей Кринин, старпом Станислав Сироткин ва капитаннинг иккинчи ёрдамчиси Валерий Савицкий озод қилинди», — деб ёзди у Instagram’даги саҳифасида.

Танкер Ливия байроғи остидаги кема томонидан халқаро сувларда ушланган эди. Ливия ҳарбийлари бунинг сабабини тушунтирмаган эди. Экипажнинг етти аъзоси ўша куниёқ қўйиб юборилган, аммо уч нафари маҳбусликда қолган эди.