Шарқий Хитойнинг Цзинань шаҳридаги (Шаньдун провинцияси) мактаблардан бирида пичоқ билан қуролланган кимса икки кишига жароҳат етказиб, ўқувчилардан бирини гаровга олди. Бу ҳақда SINA порталига таяниб, «ТАСС» хабар бермоқда.
Айни вақтда воқеа жойи ҳуқуқ-тартибот ходимлари томонидан қуршаб олинган. Мактабда ҳамон ўқувчилар бор. Ҳозирча полиция мактаб биносига ҳеч кимни киритмаяпти ва ундан ҳеч кимни ташқарига чиқармаяпти. Махсус топшириқли бўлинма жиноятчига ҳужум қилишга ва уни қўлга олишга тайёрланмоқда.
Жабрланганларнинг шахсига аниқлик киритилмаган. Уларнинг олган жароҳати қай даражада экани ҳам маълум қилинмаяпти. Тасдиқланмаган маълумотларга кўра, 2-синф ўқувчиси гаровга олинган.
Дастлабки маълумотларга кўра, жиноятчи яқин атрофдаги қишлоқлардан бирида яшайди. Тахмин қилинишича, у ва таълим муассасаси маъмурияти ўртасида можаро келиб чиққан.
Унинг хатти-ҳаракатлари сабаби ўрганилмоқда.
Изоҳ (0)