Ўзбекистон Республикаси Президенти сайловини ёритиш бўйича Республика матбуот марказида сайлов кампаниясида иштирок этаётган журналистлар учун амалий семинар ўтказилди. Видеоконференцалоқа шаклида ташкил этилган тадбирда миллий ва хорижий оммавий ахборот воситалари вакиллари, Президент сайловини ёритиш бўйича Республика матбуот маркази ҳамда округ сайлов комиссиялари матбуот марказлари ходимлари қатнашди.
Семинарда сайлов кампаниясини очиқ ва ошкора ташкил қилиш, сайловга тайёргарлик кўриш ва уни ўтказишнинг барча босқичлари ҳақида мамлакат аҳолиси ва халқаро ҳамжамиятни ўз вақтида, кенг хабардор қилиб боришда ОАВ ҳал қилувчи ўрин тутаётгани алоҳида таъкидланди.
Сайлов комиссиялари бу масалада радио ва телевидение, босма ва интернет нашрлари билан фаол ва самарали ҳамкорлик қилиб келмоқда. Ўзбекистон Республикаси Президенти сайловини ёритиш бўйича Республика матбуот маркази ва округ сайлов комиссиялари матбуот марказларида журналистлар учун зарур шароитлар яратилган. Марказий сайлов комиссияси ва округ сайлов комиссияларининг мажлисларида ОАВ вакиллари иштирок этмоқда. Бундан ташқари, комиссияларнинг мажлислари бевосита матбуот марказларида, онлайн режимида ҳам ўтказилмоқда.
Марказий сайлов комиссияси билан Ўзбекистон Миллий телерадиокомпанияси, Ўзбекистон Миллий ахборот агентлиги, «Жаҳон» ахборот агентлиги, Электрон оммавий ахборот воситалари миллий ассоциацияси, UzReport ахборот агентлиги ўртасида сайловга тайёргарлик кўриш ва уни ўтказиш жараёнини ёритиш юзасидан имзоланган икки томонлама битимлар ўзининг амалий натижаларини бермоқда.
Сайлов кампанияси бошланганлиги эълон қилинганидан буён Ўзбекистон ОАВларида бу мавзуда 4380 дан зиёд, жумладан, марказий ва ҳудудий теле- ва радиоканалларда 1700 дан зиёд интервью, сюжет ва лавҳалар, даврий нашрларда 1850 дан ортиқ, интернет нашрларида 820 дан зиёд материаллар берилди. Хорижий ОАВларда эса 600 га яқин материал эълон қилинди. Марказий сайлов комиссияси томонидан маҳаллий ва хорижий ОАВларнинг 500 нафардан ортиқ вакили, округ сайлов комиссиялари томонидан эса 430 дан зиёд маҳаллий журналист аккредитациядан ўтказилди.
Тадбирда сайловга тайёргарлик кўриш ва уни ўтказишда очиқлик ва ошкораликни таъминлашда сайлов комиссиялари ва журналистларнинг долзарб вазифалари, миллий сайлов тизими ҳамда бу борадаги қонунчилик мазмун-моҳиятини аҳоли ўртасида кенг тушунтириш ишларини ташкил этиш, сайлов кампаниясини ёритишда журналистика жанрлари имкониятларидан, замонавий медиа технологиялардан самарали фойдаланиш, сайлов комиссиялари билан ҳамкорликни янада кучайтириш каби масалалар атрофлича муҳокама қилинди.
Изоҳ (0)