Гаити ва Доминика Республикасида «Мэттью» довули оқибатида 9 киши ҳалок бўлди

Гаити ва Доминика Республикаси жойлашган Гаити оролига ёпирилган «Мэттью» довули оқибатида ҳалок бўлганлар сони 9 кишига етди. Бу ҳақда Listin Diario газетасига таяниб, «ТАСС» хабар бермоқда.

Гаити Республикасининг бешта шаҳри денгиз сатҳининг кўтарилиши ва дарёлардан сув тошиши оқибатида сув остида қолди. Бундан ташқари, пойтахт Порт-о-Пренсни маъмурий марказ Пети-Гоав ҳамда мамлакатнинг жанубий қисми билан боғлаб турувчи икки кўприк вайрон бўлди.

Де-Кайе шаҳрида эса кўплаб уйларнинг томи табиий офат оқибатида учиб кетди.

Кузатувчиларнинг фикрича, Гаити оролига ёпирилган табиий офат оқибатида юзага келган ҳолат мамлакатда 9 октябрь кунига белгиланган умумий сайловларни хавф остига солади.

Гаити Ички ишлар вазири Франсуа Аник Жозеф табиий офатга қарамай, сайловлар бўлиб ўтишига ишонч билдирди.