Эрон вице-президенти, мамлакат атом энергияси ташкилоти раҳбари Али Акбар Солиҳий 2017 йилги президентлик сайловларида номзодини қўйишни режалаштирмаган. Бу ҳақда унинг ўзи Эрон ахборот агентликлари орқали тарқатилган очиқ хатида маълум қилди, дея хабар бермоқда «ТАСС».
«Президентлик сайловларидаги иштироким нотўғри ва сиёсий жиҳатдан номақбул бўларди, деб ҳисоблайман. Мени мазкур лавозимга муносиб ҳисоблаганларга ўзимнинг миннатдорчилигимни билдираман», — дея қарорига изоҳ берди нуфузли сиёсатчи.
Олдинроқ маҳаллий ОАВда парламентнинг бир гуруҳ депутатлари сайлов кампаниясида иштирок этмаслигини билдирган собиқ президент Маҳмуд Аҳмадинажод ўрнига Солиҳийни президент лавозимига номзод сифатида илгари сурмоқчи эканлиги тўғрисида хабарлар пайдо бўлганди.
Эронда навбатдаги, 12-президентлик сайловлари 2017 йил 19 май куни бўлиб ўтади. Амалдаги президент Ҳасан Руҳоний иккинчи муддатга ўз номзодини қўйиши ва сайлов жараёнининг яққол етакчисига айланиши эҳтимоли юқори баҳоланмоқда.
Изоҳ (0)