Gaiti va Dominika Respublikasida “Mettyu” dovuli oqibatida 9 kishi halok bo‘ldi

Gaiti va Dominika Respublikasi joylashgan Gaiti oroliga yopirilgan “Mettyu” dovuli oqibatida halok bo‘lganlar soni 9 kishiga yetdi. Bu haqda Listin Diario gazetasiga tayanib, “TASS” xabar bermoqda.

Gaiti Respublikasining beshta shahri dengiz sathining ko‘tarilishi va daryolardan suv toshishi oqibatida suv ostida qoldi. Bundan tashqari, poytaxt Port-o-Prensni ma’muriy markaz Peti-Goav hamda mamlakatning janubiy qismi bilan bog‘lab turuvchi ikki ko‘prik vayron bo‘ldi.

De-Kaye shahrida esa ko‘plab uylarning tomi tabiiy ofat oqibatida uchib ketdi.

Kuzatuvchilarning fikricha, Gaiti oroliga yopirilgan tabiiy ofat oqibatida yuzaga kelgan holat mamlakatda 9-oktabr kuniga belgilangan umumiy saylovlarni xavf ostiga soladi.

Gaiti Ichki ishlar vaziri Fransua Anik Jozef tabiiy ofatga qaramay, saylovlar bo‘lib o‘tishiga ishonch bildirdi.