Nintendo компанияси акциялари Токио биржасида 8 сентябрь куни 13,2 фоизга — бир донаси 24 695 иенадан 27 955 иенагача қимматлашди, деб ёзади «РБК».
Аввалроқ NASDAQ биржасида компаниянинг Америка депозитар тилхатлари (АDR) жуда тез ўсган эди — бир кун ичида ушбу қоғозлар бирдан 28,79 фоизга (28,2 доллардан 36,32 долларгача) қимматлашиб кетди.
Wall Street Journal экспертлари Nintendo қимматбаҳо қоғозлари нархининг кескин кўтарилишини бош қаҳрамони сувсоз (водопроводчи) Марио бўлган машҳур ўйиннинг смартфон версиясининг чиқиши кутилаётгани билан боғлади.
Аввалроқ Марио ҳақидаги ўйин ишлаб чиқувчиси Сигэру Миямото Apple раҳбари Тим Кук билан биргаликда iPhone 7 тақдимотида иштирок этган ва 2016 йил декабригача Super Mario Run дастури чиқарилиши ҳақида эълон қилган эди. Миямото, шунингдек, ўйин версиясини Android тизимида ишлайдиган смартфонларга ҳам ўрнатиш мумкин бўлишини айтди.