Тошкент вилоятининг Ангрен шаҳрида 21 август, якшанба куни ҳаво ҳарорати +32 даражадан ошмади. Бу, «Ўзгидромет» маълумотига кўра (pdf), Ўзбекистоннинг вилоят марказлари ва йирик шаҳарлари орасида шу куни қайд этилган энг салқин ҳаводир.
Ўзбекистоннинг тоғли ҳудудларида, одатдагидек, бундан-да салқинроқ ҳаво ҳукмронлик қилган. Хусусан, Чимён ён-бағирларида ҳаво ҳарорати +25 даражадан ошмаган, ҳаво ҳарорати +22 даражагача кўтарилган Қамчиқ довонида ёмғир ёғиб, момақалдироқ бўлган.
21 август куни Ўзбекистондаги энг иссиқ ҳарорат Навоий вилоятининг Бузаубай қўрғонида қайд этилган бўлиб, бу ерда ҳарорат +40 даражагача кўтарилди. Мамлакатнинг йирик шаҳарлари орасида эса энг юқори ҳарорат Термизда қайд этилди (+38 даража).
Шу куни Самарқанд шаҳрида ҳаво ҳароратининг энг юқори кўрсаткичи +34 даражани, Андижон, Наманган, Фарғона шаҳарларида +35 даражани, Тошкент, Урганч, Бухоро, Навоий, Жиззах, Қарши шаҳарларида +36 даражани, Нукус ва Гулистон шаҳарларида эса +37 даражани ташкил этди.
«Ўзгидромет»нинг қайд этишича, Қорақалпоғистон Республикасининг Жаслиқ ҳудудида 21 август ҳисобидан Ўзбекистон ҳудудидаги энг кучли шамоллар кузатилган — ҳаво ҳарорати +35 даражагача кўтарилган ҳудудда шамолнинг тезлиги сониясига 25 метрга етган.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)