Шу кунларда Ўзбекистондаги барча абитуриентларни бир савол қийнамоқда — олий таълим муассасаларига кириш имтиҳонлари натижалари қачон эълон қилинади?
2016 йилги тест имтиҳонлари натижалари қачон эълон қилиниши борасида ҳозирча аниқ бир ахборот йўқ. Бироқ бундан аввалги йилларда мандат қачон чиққанини бир ёдга олиш мумкин.
2015 йили тест имтиҳонлари натижалари олийгоҳларнинг ўзида 20 август куни эълон қилинган. Ундан бир кун аввал — 19 август куни кечаси эса имтиҳон натижасини билиш мақсадида SMS йўллаганларга жавоблар кела бошлаган ва ДТМ сайтидаги тест натижаларини билиш саҳифаси ишга тушган эди.
2014 йили барча абитуриентлар орзиқиб кутган натижалар 16 август куни эълон қилинган. Ўшанда ҳам мобил алоқа операторлари жорий қилган SMS хизматлари бир кун аввалдан — 15 августдан эътиборан тест натижалари ҳақида ахборот тақдим эта бошлаган.
Ундан бир йил — 2013 йили ҳам олий таълим муассасаларига кириш имтиҳонлари натижалари 16 август куни эълон қилинган эди. SMS хизматлари эса 15 август оқшомидаёқ тест натижалари ҳақида абитуриентларни бохабар қилишни бошлаган.
Маълумот учун, 2012 йили олий таълим муассасаларига кириш учун 432 мингдан ортиқ, 2013 йили 480 мингдан зиёд, 2014 йили 543 мингдан кўпроқ абитуриент ҳужжат топширган эди. Кейинги — 2015- ва 2016 йилларда эса ҳужжат топширган абитуриентлар сони сезиларли даражада — 600 мингдан ошиб кетганлиги муносабати билан (мос равишда 605 836 ва 663 298 нафар абитуриент), балки, тест натижаларини эълон қилиш муддати бироз кейинроққа сурилаётган бўлиши мумкин.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)