Озарбайжоннинг «Загатала» клуби ҳужумчиси, нигериялик Майкл Умайника жамоа машғулотларида ҳаётдан кўз юмди. Бу ҳақда APА нашри хабар бермоқда.
Клуб президенти Муса Гурбанов футболчининг вафот этганини тасдиқлади. Унинг сўзларига кўра, ҳодиса 15 август куни рўй берди.
«Майкл ўтган мавсумда бизнинг жамоа сафида тўп сурган. Нима дейишни ҳам билмайман. Ўтган йили у клубнинг тиббий кўригидан муваффақиятли ўтганди. Жамоага у бир неча кун аввал келиб қўшилди а машғулотларда жон берди. Ҳозир мен Бокудаман, эртага Загаталага қайтаман«, – деди Гурбанов.
Загатала вилоятининг марказий шифохонасининг маълум қилишича, футболчи, дастлабки тахминларга кўра, тромб узилиши оқибатида ҳалок бўлган. Марҳумнинг жасади суд тиббий экспертизасига жўнатилди. Ҳодиса юзасидан суриштирув ишлари олиб борилмоқда.
«Загатала» клуби Озарбайжон чемпионатининг иккинчи дивизионида иштирок этади. Ўтган мавсумда жамоа олтинчи ўринни эгаллаганди.
Изоҳ (0)