АҚШ ўз хавфсизлигига зарар етказмаган ҳолда биринчи ядро зарбасини бериш сиёсатидан воз кечиши ва ўз ядро арсеналини тахминан мингта стратегик жанговар каллакларгача қисқартириши мумкин. Бундай фикрни АҚШ Штаб бошлиқлари қўмитаси раиси собиқ ўринбосари, Стратегик қўмондонлик собиқ қўмондони Жеймс Картрайт ҳамда «Минитмен»стратегик ракеталарини учириш мажмуаси собиқ навбатчи офицери Брюс Блэр билдирди, деб ёзади «ТАСС».
«Совуқ уруш тугагач, бизнинг ядровий бўлмаган қуролни қўллаш бўйича имкониятларимизда инқилобий ўзгаришлар содир бўлди, ядровий қурол-яроғларни қўллаш соҳаси эса доимий равишда қисқариб келди ва шундай даражага етдики, бугунги кунда ядро қуроли душманларимиз уни биринчи бўлиб қўлламаслиги учун уларни тийишдан бошқа мақсадда ишлатилмайди, — дейилади улар чоп этган мақолада. — Бизнинг ядровий бўлмаган қудратимиз, жумладан, иқтисодий ва дипломатик қудратимиз, альянсларимиз, ядровий бўлмаган қурол-яроғларимиз ҳамда кибермакондаги операция имкониятларимиз, шунингдек, технологик имкониятларимиз глобал кўламда улкан куч демакдир. Душманларимиз ушбу қуролни биринчи бўлиб қўллашдан тийилиб турар экан, АҚШ ўз-ўзини ҳимоя қилиш ҳамда иттифоқдошларимизнинг ҳаётий зарур манфаатларини муҳофаза қилиш учун ядровий қурол-яроғга эҳтиёж ҳам сезмайди».
Мақола муаллифлари таъкидлашича, «ядро қуролини Россия ёки Хитойга қарши биринчи бўлиб қўллаш бизнинг ва иттифоқдошларимизнинг ҳам ҳаётини хавф остига қўйган бўларди, чунки бу тўлиқ кўламдаги жавоб кўрсатилишига олиб келарди».
Уларнинг фикрича, ядро қуроли кимёвий ёки биологик қурол-яроғга эга мамлакат ёки террорчилик гуруҳларига қарши ишлатилиши мумкин эмас. «Бундай қадам ҳаддан ташқари бўларди, чунки бундай хавфларни даф қилишнинг муқобил усуллари мавжуд», — дейилади мақолада.
Изоҳ (0)