Ҳиндистондаги асосий миллий байрамлардан бири — Мустақиллик куни 15 август, душанба куни Нью-Делида мисли кўрилмаган даражада кучайтирилган хавфсизлик чоралари шароитида нишонланмоқда, деб ёзади «ТАСС».
Махсус хизматлардан эҳтимолий террорчилик ҳужумлари ҳақида огоҳлантиришлар олган ички ишлар вазирлиги хабарига кўра, Нью-Дели кўчаларида 50 мингдан ортиқ патруль хизматчилари навбатчилик қилмоқда.
Алоҳида эътибор Қизил қалъа (ХVII аср меъморий ёдгорлиги)га қаратилган, асосий тантаналар унинг яқинида бўлиб ўтмоқда. 70 йил аввал республиканинг биринчи бош вазири Жавоҳарлал Неру томонидан бошлаб берилган анъанага кўра, тарихий қалъа тепасида байроқ кўтарилгач, республика ҳукумати раҳбари фахрий қоровул ёнидан ўтиб, халққа мурожаат билан чиқиш қилади.
Ушбу ҳудуд атрофида хавфсизлик хизматларининг 15 минг ходимидан иборат саккизта қуршов доираси ҳосил қилинди, 500 дан зиёд кузатув камералари ўрнатилди. Баланд биноларга снайпер «уялари» ва ракетага қарши мудофаа тизимлари ўрнатилди.
Эслатиб ўтамиз, аввалроқ Ҳиндистон шимолидаги Сринагар шаҳрида армия блокпостига жангарилар ҳужум қилган, оқибатда камида тўрт нафар ҳарбий хизматчи яраланган эди. Террорчилар шу тариқа Ҳиндистонда нишонланаётган Мустақиллик куни давлат байрами тантаналарини бузмоқчи бўлгани тахмин қилинди.
Изоҳ (0)