Халқаро паралимпия қўмитаси Россия паралимпия терма жамоасини Рио-де-Жанейрода ўтадиган Ёзги Олимпиада ўйинларидан тўлиқ таркибда четлаштирди. Бу ҳақда TJournal хабар бермоқда.
Қарор Ричард Макларен бошчилигидаги WADA мустақил аксилдопинг комиссияси ҳисоботини ўрганиш натижаларига кўра қабул қилинди.
Қўмита раҳбари Филип Крэйвеннинг сўзларига қараганда, Сочидаги Паралимпия ўйинлари чоғида допинг намуналари алмаштирилгани борасида далиллар мавжуд. Шунингдек, WADA ҳисоботида 2012–2015 йиллар орасида россиялик паралимпиячиларнинг 35 ижобий допинг намуналари йўқолиб қолгани ҳақида маълумотлар келтирилади.
Халқаро паралимпия қўмитаси бутун Россия термасини дисквалификация қилиш қарорига яқинлиги ҳақида 6 август куни The Guardian хабар қилган эди. Аммо кейинчалик бир қатор амалдорлар якуний қарор 7 август куни ўтказиладиган матбуот анжуманида ошкор қилиниши ҳақида маълумот берди.
Рио–2016 доирасидаги Паралимпия ўйинлари 7–18 сентябрь кунлари бўлиб ўтади.
Изоҳ (0)