Шу йилнинг май ойидан буён Муқимий ва Шота Руставели кўчаларида қурилаётган йўл ўтказгичи сентябрь ойида ишга тушиши кутилмоқда. Бу ҳақда «Ўзбекистон темир йўллари» АК ахборот хизмати маълум қилмоқда.
Йўл ўтказгичининг умумий узунлиги қарийб 1 километрга тенг бўлади ҳамда Муқимий ва Бобур кўчаларини боғлаб туради. Пиёдалар учун бу ерда ўтган йили Хадра майдонидаги каби ер усти ўтиш йўли барпо этилиб, лифт ва эскалаторлар билан жиҳозланади.
Ярим айлана шаклидаги радиуси 150 даража бўлган Муқимий–Руставели йўл ўтказгичи ўз конструкцияси бўйича Ўзбекистонда биринчи сунъий иншоот ҳисобланади.
Бундан ташқари, «Ўзбекистон темир йўллари» АК томонидан Оқтепа майдонида автомобиль йўл кесишмаларида кенг кўламли ўзгаришлар олиб борилмоқда. Бу ерда Бўрижар канали орқали сув қувурлари ўтказилмоқда ва ундаги бетон конструкцияси устидан автомобиль йўли ўтади. Шунингдек, иккита ер усти ўтиш йўли қурилади. Лойиҳага кўра, улар ҳам лифт ва эскалаторлар билан жиҳозланади.
Шунингдек, Нурафшон кўчасинининг қурилишини давом эттириш лойиҳаси бўйича трамвай йўллари ўтган ва демонтаж қилинганидан сўнг Оқтепа майдонидан Муқимий, Шота Руставели, Қушбеги кўчаларигача, Кичик автомобиль ҳалқа йўли бўйлаб Шимолий вокзал орқали Тараққиёт кўчаларининг йўлларини кенгайтириш бўйича қурилиш ишлари давом этмоқда.
Юқоридаги барча объектларнинг қурилиш ишлари ва реконструкцияси сентябрь ойида якунланиши кўзда тутилган.
Изоҳ (0)