Хитой шимолидаги Хэбэй провинциясида кучли ёмғир ёғиши оқибати камида бир киши ҳалок бўлди, яна 8 нафари бедарак йўқолди. Бу ҳақда «Сина» порталига таяниб, «ТАСС» хабар бермоқда. Ҳудуд расмийлари ноқулай об-ҳаво туфайли хавфнинг энг юқори — «қизил» даражасини эълон қилди.
Кучли ёмғирлар Хэбэй провинциясида 19 июль, сешанба кунидан буён давом этмоқда. Маълум қилинишича, провинциянинг маъмурий шаҳри – Шицзячжуанда 13 та ер ости ўтиш йўллари сув билан тошган. Цисянь уездида 500 миллиметр ёғингарчилик бўлди. Маҳаллий ҳукумат расмийлари аҳолига зарурат бўлмаса кўчага чиқмасликни тавсия қилмоқда. Шунингдек, аҳоли тоғли ҳудудларда ер кўчиши хавфи билан огоҳлантирилди.
«Синьхуа» агентлигининг маълум қилшича, Хэбэй провинцияси расмийлари 67,2 мингдан зиёд аҳолини эвакуация қилган. Пекин расмийлари ҳам ёғингарчилик туфайли хавфнинг «сариқ» даражасини эълон қилди.
Сўнгги маълумотларга кўра, мамлакатдаги табиий офатлардан ҳалок бўлганлар сони 237 кишини ташкил қилмоқда, яна 93 нафари бедарак йўқолган деб ҳисобланмоқда.
Хитойда табиий офат хавфини огоҳлантиришнинг тўрт даражаси жорий этилган. Унда ўсиб бориш даражасига кўра кўк, сариқ, тўқ сариқ ва қизил ранглар билан белгиланади.
Изоҳ (0)