Хитой Халқ Республикасининг Пекин, Шанхай ва Сиань шаҳарларида «Ўзбек киноси кунлари» фестивали ўтказилди. Бу ҳақда «Ўзбеккино» миллий агентлиги матбуот хизмати хабар бермоқда.
Фестивалда «Ўзбеккино» Миллий агентлиги буюртмасига биноан суратга олинган «Ҳаётда...», «Қудуқ», «Виждон», «Ота», Тубанлик», «Сеҳрли қалпоқча» каби бадиий фильмлар намойиш этилди. Фестиваль давомида мазкур фильмлар намойишларига 5000 дан зиёд кино ихлосмандлари ташриф буюрди.
Хитой матбуот, ноширлик, радиоэшиттириш, кинематография ва телевидение ишлари бўйича давлат бош бошқармаси бошлиғи Чжан Хунсенга кўра, ушбу фестиваль Хитой Халқ Республикаси Раиси Си Цзиньпиннинг жорий йил 21—23 июнь кунлари Ўзбекистон Республикасига амалга оширган давлат ташрифининг натижаси бўлиб, икки халқнинг маданий-маърифий ва ижтимоий соҳалардаги алоқаларини янада мустаҳкамлашга хизмат қилди.
«Ўзбеккино» Миллий агентлиги бош директори Отабек Мусаев фестиваль доирасида намойиш этилган фильмлар орқали ўзбек маданияти ҳамда анъаналари билан янада яқинроқ ва чуқурроқ танишиш имконияти мавжуд эканлигини таъкидлаб ўтди. Ўзбек ва хитой кинематографлари билан тажриба алмашиш ва ҳамкорликда фильмлар ишлаб чиқаришда ушбу фестиваль дастлабки муҳим қадам эканлигини билдирди.
Хитойнинг йирик шаҳарларида бўлиб ўтган ушбу фестивални кўплаб маҳаллий оммавий ахборот воситалари ёритиб борди. Жумладан, Chinanews, Chinadaily, CCTV-6 каби йигирмадан ортиқ ахборот воситаларида берилган ахборотлар натижасида миллионлаб кишилар фестиваль ишидан хабар топди.
Изоҳ (0)