Туркия бош вазири ҳарбий тўнтаришга уринишда 265 киши ҳалок бўлганини маълум қилди

Туркия бош вазири Биноли Йилдирим ҳарбий тўнтаришга уринишда 265 киши ҳалок бўлганини маълум қилди. Бу ҳақда Al Jazeera’га таяниб, «Газета.ru» хабар бермоқда.

265 кишидан 161 нафари ҳукумат тарафдорлари ва тинч аҳоли вакиллари бўлгани айтилмоқда.

Армиянинг амалдаги раҳбари Умид Дундар ҳалок бўлганлардан 104 нафари исёнчи, камида 47 нафари оддий фуқаролар эканлигини маълум қилди.

Эслатиб ўтамиз, олдинроқ ОАВлар исёнчиларнинг мамлакатдаги етакчиси, Туркия ҲҲКнинг собиқ бош қўмондони Акин Ўзтурк қўлга олинганлиги хабар берилганди.

• Туркиядаги ҳарбий тўнтариш

Туркияда 16 июлга ўтар кечаси ҳарбий тўнтаришга уриниш юз берди. Ҳодиса натижасида 1,1 мингдан ортиқ одам яраланди. 1,5 мингдан ортиқ ҳарбий ҳибсга олинди. Суд муассасаларининг 2,7 мингдан ортиқ ходимлари ўз вазифасидан озод этилди.