Европа футбол уюшмалари иттифоқи (УЕФА) вице-президенти, испаниялик Анхель Мария Вильяр ташкилот президентлигига сайловларда иштирок этади. Бу ҳақда «ТАСС» хабар бермоқда.
As нашри маълумотларига кўра, у УЕФА ижроия қўмитасининг 16 аъзосидан 13 нафарининг қўллаб-қувватлашига эришган. Вильяр талабномалар бериш муддати якунланадиган 20 июлга қадар номзоди илгари сурилиши ҳақида расман билдирмасликка қарор қилган. Шунингдек, олдинроқ иттифоқ президентлиги учун словениялик Александер Чеферин ва нидерландиялик Михаэл ван Праг ҳам курашишларини маълум қилганди. УЕФА янги президенти сайлови 14 сентябрь куни Афинада бўлиб ўтади.
УЕФАнинг амалдаги президенти Мишель Платини 2015 йил декабрида саккиз йилга футбол фаолиятидан четлаштирилганди. Кейинчалик ушбу муддат олти йилга қисқартирилди. Платини Лозаннадаги спорт арбитраж судига четлаштириш муддатини қисқартириш бўйича апелляция берди. Унинг апелляцияси қисман қониқтирилди — дисквалификация муддати олти йилдан тўрт йилгача, жарима миқдори 80 мингдан 60 минг еврогача қисқарди.
Изоҳ (0)