29 июндан 10 июлга қадар афсонавий ультра-марафончи Дин Карнасис Буюк Ипак йўли бўйлаб Ўзбекистон, Қирғизистон ва Қозоғистон ҳудудидан югуриб ўтади. АҚШ Давлат департаменти ташкил этган тадбир уч мамлакат мустақиллигининг 25 йиллигига бағишланади, деб хабар бермоқда «Газета.uz».
АҚШнинг Ўзбекистондаги элчихонаси берган ахборотга кўра, Дин Карнасис «Спорт элчиси» (Sports Envoy) дастури доирасида 11 кун давомида 525 километр масофани югуриб ўтиб, Бишкекдан Тошкентга, у ердан эса Олмаотага боради.
Кунига ўртача 80 километрдан югуриши кўзланган Карнасис АҚШ вакили сифатида алоқалар ўрнатади, югуриш бўйича қисқа машғулотлар ўтказади, чиқишлар қилади ҳамда турли ёшдаги инсонларни югуришга қўшилишга чақиради.
«Инсонларни, маданиятларни ва тарихни боғлар экан, Диннинг Марказий Осиё бўйлаб саёҳати спорт дипломатиясининг турли маданият ва миллат вакилларини бирлаштириш қудратини намойиш этиш имкониятини беради», — дейилади элчихона хабарномасида.
Дин Карнасис Time журнали томонидан дунёдаги энг эътиборли инсонлар юзлигига киритилган. У 563 километр масофани уч кеча-кундуз давомида ухламай босиб ўтгани билан машҳур. Бундан ташқари, яқинда у кетма-кет 50 кун давомида АҚШнинг барча 50 штати бўйлаб марафонлар уюштирди.
Изоҳ (0)