Таниқли актёр ва хонанда Жавоҳир Зокиров Facebook’даги саҳифасида «Болалар» гуруҳининг дастлабки клипларидан бири — «Эсингдами сени қиш кунлари» номли таронага ишланган видеодан парча эълон қилди. Мазкур хабар тайёрланаётган вақтда видеога 4 мингга яқин лайк ва муносабат билдирилган, 3 мингга яқин марта улашилган, видео остида эса 270 дан ортиқ коммент ёзилган эди.
Клипнинг бошида «Болалар» гуруҳи асосчиси Жавоҳир Содиқов: «Ҳаммага салом!», — деб пайдо бўлади ва гуруҳни томошабинга таништиради.
«Сизнинг хизматингизда Тошкентнинг энг зўр, ‘самий дискотечний’ группаси — «Болалар»! Ўзбекистон ёшларига 1990 йил январь ойида ёзилган қўшиғимизни ҳадя этамиз. Раҳбаримиз — Руслан Шарипов. Бизнинг солистлар — Тоҳир Содиқов, Баҳодир Пўлатов ва мен — Жавоҳир Зокиров. Қани болалар, бошладик!», — Жавоҳир Зокиров шу сўзларни айтганидан сўнг, экранда Тоҳир Содиқов пайдо бўлиб, қўшиқни куйлай бошлайди.
Видео, катта эҳтимол, сўнгги вақтларда баъзи суратлари тарқалиб, муҳокамаларга сабаб бўлган Ўзбекистонда хизмат кўрсатган артист Руслан Шариповнинг сермаҳсул ижодини ёдга олиш мақсадида эълон қилинган. Видео остидаги комментларда ҳам баъзи фойдаланувчилар Руслан Шариповнинг катта иқтидор соҳиби бўлганини қайд этиб ўтган.
Видео ҳақидаги аксарият фикрлар хотиравий бўлиб, қувноқ кайфиятда ёзилгани сезилиб туради. «Ҳозир бу клипни кўриб, гуруҳ аъзоларининг ўзи ўзидан ҳайратда бўлса керак», — деб ёзади бир фойдаланувчи. Фойдаланувчиларнинг бири: «Шунақа рақс ҳаракатлари мода бўлган эди-да ўша вақтлар», — деб фикр билдирган бўлса, бошқаси: «Қизлар Тоҳирни деб ақлдан озарди! Эҳ, ажойиб дамлар эди!», — деб ёзган.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)