Ўзбекистоннинг баъзи рақамли ва кабел телевидение компаниялари Евро—2016 учрашувлари трансляцияси вақтида Россиянинг «Матч ТВ» телеканалида Ўзбекистоннинг UzReport-TV телеканали кадрларини узатмоқда. Бу ҳақда оммабоп мессенжерлардаги гуруҳларда, ижтимоий тармоқларда, хусусан, Facebook’даги «Потребитель.uz» гуруҳида хабар қолдирилган.
Россиянинг «Матч ТВ» телеканали ҳам, Ўзбекистоннинг UzReport-TV телеканали ҳам футбол бўйича 2016 йилги Европа чемпионати учрашувларини трансляция қилмоқда. «Матч ТВ»да учрашувларни россиялик машҳур шарҳловчилар шарҳлаб бораётган бўлса, UzReport-TV’даги шарҳларда актёр, режиссёр, ҳаваскор футболчи Алишер Узоқов, Ўзбекистон Футбол Федерацияси матбуот котиби Санжар Ризаев, ўтмишнинг машҳур футболчиларидан бири Азамат Абдураимов қатнашмоқда, шунингдек, россиялик таниқли шарҳловчи Александр Елагин ҳам баъзи учрашувларни UzReport-TV’да шарҳлаши кутилмоқда.
Фойдаланувчиларнинг маълум қилишича, UzDigital-TV компанияси айнан Евро—2016 учрашувлари трансляцияси вақтида «Матч ТВ»нинг намойишини вақтинча тўхтатиб, унинг диапазонида UzReport-TV телеканалини ретрансляция қилмоқда. Ваҳоланки, UzReport-TV телеканали UzDigital-TV’нинг телеканаллар пакетида алоҳида кўрсатилган ва унинг дастурларини ўз диапазонида томоша қилиш мумкин.
«Бу ҳолатдан менинг ҳам аччиғим чиқди. Бироқ учрашувлар Россиянинг ‘Футбол 1’ телеканали орқали такроран намойиш этилмоқда», — деб ёзади фойдаланувчилардан бири. Евро—2016 учрашувлари вақтида «Матч-ТВ» ўрнига UzReport-TV трансляциясини улаётган провайдерлар орасида ISTV ҳам борлиги айтилган. Бошқа — Turon Telecom, «МТС-ТВ» каби провайдерларнинг абонентлари, шунингдек, параболик антеннадан фойдаланувчилар учрашувлар трансляцияси вақтида «Матч-ТВ»да ўзгариш бўлмаётганини таъкидлаган.
Қайд этиш жоиз, UzDigital-TV компанияси ҳам, ISTV компанияси ҳам Евро—2016 учрашувлари вақтида «Матч-ТВ» кадрлари ўрнига UzReport кўрсатилиши ҳақида огоҳлантириш бермаган. Маълумот учун, UzDigital-TV компаниясининг ўз абонентлари билан имзолайдиган очиқ офертаси (pdf) 5.1. бандига кўра, компания Ўзбекистон ҳудудида трансляция этилишига ваколатли орган томонидан рухсат этилган Телеканаллар пакети рўйхатини, у ёки бу теледастурларни қўшиш ёки олиб ташлаш йўли билан, абонентларни огоҳлантирмасдан ўзгартириш ҳуқуқига эга.
Изоҳ (0)