Россиялик теннисчи Мария Шарапова Халқаро теннис федерацияси (ITF)нинг уни икки йилга дисквалификация қилиш ҳақида чиқарган қарорига апелляция беради. Бу ҳақда Шарапова Facebook’даги саҳифасида маълум қилди, деб хабар бермоқда «РБК».
«Спорт арбитраж суди (CAS)га ушбу қарор бўйича зудлик билан эътироз билдираман», – деди у.
Шарапова хабарномасида мустақил трибунал унинг тақиқланган препаратларни беихтиёр қабул қилганини тан олганини алоҳида таъкидлаб ўтди. «ITF менинг антидопинг қоидаларини қасддан бузганлигимни исботлаш учун жуда кўп вақт сарфлади», деди Мария. Россиялик теннисчи, шунингдек, федерация трибуналдан уни тўрт йилга четлатишни сўрагани, бироқ трибунал буни рад этганини маълум қилди.
«Мен тўғри деб ҳисоблаган нарса учун курашаман. Шу сабабли, теннис кортига тезроқ қайтиш учун ҳаракат қиламан», – дейилади Мариянинг хабарномасида.
Мария Шарапованинг икки йилга дисквалификация қилинишига унинг допинг намунасида тақиқланган мельдоний препарати аниқлангани сабаб сифатида кўрсатилмоқда. Допинг намуна 2016 йилнинг 26 январида, Australian Open теннис турнирининг чорак финалидан сўнг олинган эди. Дисквалификация туфайли россиялик теннисчининг ушбу турнирдаги натижалари бекор қилиниб, рейтинг очколари олиб ташланади. Бундан ташқари, спортчи Australian Open’да олган мукофот пулини ҳам қайтариши керак бўлади.
Эслатиб ўтамиз, 7 март куни Шарапова махсус ташкил этилган матбуот анжуманида Australian Open’даги допинг намунасида 2016 йилнинг 1 январидан тақиқланган препаратлар рўйхатига киритилган мельдоний аниқланганини тан олганди. Халқаро теннис федерацияси спортчини 12 мартдан бошлаб мусобақаларда иштирок этиш ҳуқуқидан маҳрум этди.
«2015 йилнинг 22 декабрь куни Халқаро антидопинг агентлиги (WADA)дан тақиқланган препаратлар рўйхатидаги ўзгаришлар ҳақида электрон хат олдим. Аммо хатни очиб кўрмагандим», – дея тушунтирди Мария.
Изоҳ (0)