Мадриднинг «Реал» клуби ҳужумчиси Криштиану Роналду Европа Чемпионлар Лигаси финалида «Атлетико»га қарши кечадиган ўйин олдидан фикрларини билдириб ўтди, деб хабар бермоқда «Uff.uz».
«Мен кичик жароҳат олдим, аммо эртага ёки индинга тўлиқ тайёр бўламан. ЕЧЛдаги шахсий рекордимни янгиласам яхши бўларди, аммо мен рекордларга боғланиб қолмаганман. Улар ўз-ўзидан пайдо бўлади. Энг муҳими – ғалаба қозониш. Гарчи гол ура олмасам ҳам, ғалабага эришсак, хурсанд бўламан. Рекорд эса меники бўлиб қолаверади. Албатта, гол уришни истайман, аммо буни уддалай олмасам ҳам ‘Реал’га навбатдаги Чемпионлар Лигаси кубогини бошқа жамоадошим келтиришига умид қиламан», – деди Роналду.
Кеча, 24 май куни Роналду «Реал»нинг навбатдаги машғулотида жароҳат олиб, машғулотни охирига етказмай майдонни тарк этганди. Кейинроқ олинган жароҳат жиддий характерга эга эмаслиги маълум бўлди.
Маълумот ўрнида, португалиялик 31 ёшли футболчи жорий мавсум давомида ЕЧЛнинг 11 учрашувида 16 та гол киритди. У 2013/2014 йилги мавсумда ЕЧЛ ўйинларида жами 17 та гол уриб, рекорд ўрнатган эди.
Эслатиб ўтамиз, «Реал» 28 май, шанба куни Европа Чемпионлар Лигаси финалида «Атлетико»га қарши баҳс олиб боради. Мазкур учрашув Милан шаҳридаги «Сан-Сиро» стадионида ўтказилади.
Изоҳ (0)