Ўзбекистон термаси 2 июнь куни Тошкентда Экваториал Гвинея билан ўртоқлик ўйинида майдонга тушади

Футбол бўйича Ўзбекистон миллий терма жамоаси 2 июнь куни Тошкентда Экваториал Гвинея миллий терма жамоасига қарши ўртоқлик учрашувини ўтказади, деб хабар бермоқда Ўзбекистон футбол федерацияси матбуот хизмати.

• Ўзбекистон миллий терма жамоаси 2 июнь куни Африка қитъаси термаси билан ўйнаши мумкин

Ҳар икки федерация расмийлари ўртасида ўтказилган музокаралар муваффақиятли якунланди ва терма жамоалар 2 июнь куни Тошкентда ўртоқлик учрашувини ўтказиш бўйича келишувга эришди. Унга кўра, мазкур ўртоқлик ўйини 2 июнь, пайшанба куни Тошкентдаги «Бунёдкор» стадионида бўлиб ўтади. Учрашувнинг бошланиш вақти 19:00 га белгиланган.

Маълумот учун, айни дамда ФИФА рейтингида 83-ўринда бораётган Экваториал Гвинея терма жамоаси 2015 йилда ўзи мезбонлик қилган Африка Миллатлар Кубоги мусобақасида ярим финалга қадар етиб борган. Экваториал Гвинея терма жамоасини ҳозирда аргентиналик Эстебан Беккер бошқариб бормоқда.

• Ўзбекистон ва Қирғизистон ўртасидаги ўртоқлик учрашуви бекор қилинди

Қайд этиш жоиз, 13 май куни Ўзбекистон футбол федерацияси матбуот хизмати 2 июнь куни Тошкентдаги «Бунёдкор» стадионида Ўзбекистон миллий термаси Қирғизистонга қарши майдонга тушишини хабар қилганди. Аммо 21 май куни ЎФФ матбуот хизмати бу учрашув бекор қилинганини хабар берди.

Экваториал Гвинеяга қарши учрашувдан кейин 4 июнь куни Самвел Бабаян шогирдлари Австриядаги йиғинга жўнаб кетади ва у ерда 7 июнь куни Канада термасига қарши майдонга тушади.

Эслатиб ўтамиз, Ўзбекистон терма жамоаси ЖЧ–2018 турнири 3-саралаш босқичидаги илк учрашувини шу йилнинг 1 сентябрь куни Тошкентда Сурия терма жамоасига қарши ўтказади.