O‘zbekiston termasi 2-iyun kuni Toshkentda Ekvatorial Gvineya bilan o‘rtoqlik o‘yinida maydonga tushadi

Futbol bo‘yicha O‘zbekiston milliy terma jamoasi 2-iyun kuni Toshkentda Ekvatorial Gvineya milliy terma jamoasiga qarshi o‘rtoqlik uchrashuvini o‘tkazadi, deb xabar bermoqda O‘zbekiston futbol federatsiyasi matbuot xizmati.

• O‘zbekiston milliy terma jamoasi 2-iyun kuni Afrika qit’asi termasi bilan o‘ynashi mumkin

Har ikki federatsiya rasmiylari o‘rtasida o‘tkazilgan muzokaralar muvaffaqiyatli yakunlandi va terma jamoalar 2-iyun kuni Toshkentda o‘rtoqlik uchrashuvini o‘tkazish bo‘yicha kelishuvga erishdi. Unga ko‘ra, mazkur o‘rtoqlik o‘yini 2-iyun, payshanba kuni Toshkentdagi “Bunyodkor” stadionida bo‘lib o‘tadi. Uchrashuvning boshlanish vaqti 19:00 ga belgilangan.

Ma’lumot uchun, ayni damda FIFA reytingida 83-o‘rinda borayotgan Ekvatorial Gvineya terma jamoasi 2015-yilda o‘zi mezbonlik qilgan Afrika Millatlar Kubogi musobaqasida yarim finalga qadar yetib borgan. Ekvatorial Gvineya terma jamoasini hozirda argentinalik Esteban Bekker boshqarib bormoqda.

• O‘zbekiston va Qirg‘iziston o‘rtasidagi o‘rtoqlik uchrashuvi bekor qilindi

Qayd etish joiz, 13-may kuni O‘zbekiston futbol federatsiyasi matbuot xizmati 2-iyun kuni Toshkentdagi “Bunyodkor” stadionida O‘zbekiston milliy termasi Qirg‘izistonga qarshi maydonga tushishini xabar qilgandi. Ammo 21-may kuni O‘FF matbuot xizmati bu uchrashuv bekor qilinganini xabar berdi.

Ekvatorial Gvineyaga qarshi uchrashuvdan keyin 4-iyun kuni Samvel Babayan shogirdlari Avstriyadagi yig‘inga jo‘nab ketadi va u yerda 7-iyun kuni Kanada termasiga qarshi maydonga tushadi.

Eslatib o‘tamiz, O‘zbekiston terma jamoasi JCh–2018 turniri 3-saralash bosqichidagi ilk uchrashuvini shu yilning 1-sentabr kuni Toshkentda Suriya terma jamoasiga qarshi o‘tkazadi.