Toshkentda yo‘l yoqasida beo‘xshov qoldirilgan Lacetti sabab Volvo rusumli o‘t o‘chirish mashinasi harakatni davom ettira olmadi. Bu haqda 20-may, juma kuni Facebook’dagi “Voditeli Tashkenta” guruhida fotoxabar e’lon qilingan.
Qayd etishlaricha, hodisa 19-may kuni yuz bergan, biroq aynan qayerda bo‘lganiga aniqlik kiritilmagan.
Voqea joyini tanigan foydalanuvchilar bu yo‘l aslida ikki tomonlama harakat uchun mo‘ljallangani, yo‘l yoqasida mashina qoldirish taqiqlangani, ko‘cha boshiga tegishli taqiqlovchi belgi o‘rnatilganini ma’lum qilgan.
Bir guruh foydalanuvchilar shoshilinch xizmatlarning faoliyatiga xalal bergan mana shunday avtomobillarning haydovchilariga nisbatan katta jarima choralarini tatbiq etishni taklif qilgan.
Ma’lumot uchun, Ma’muriy javobgarlik to‘g‘risidagi kodeksning 128-6-moddasiga muvofiq, transport vositalari haydovchilarining to‘xtash va to‘xtab turish qoidalarini buzishi eng kam ish haqining uch baravari (20-may holatiga ko‘ra — 390 720 so‘m)dan o‘n baravari (1 953 600 so‘m)gacha jarima solinishiga sabab bo‘ladi.
Izoh (0)