Жорий йилнинг 8 май куни Англия чемпионатининг 37-турида «Тоттенҳэм» жамоаси ўзига тегишли «Уайт Харт Лейн» стадионида «Саутгемптон» футболчиларини қабул қилиб, 1:2 ҳисобида енгилди. Лондон клуби сафида Сон Хён Мин ҳисобни очган бўлса, «авлиёлар» аъзоси Стивен Дэвис дубл билан жавоб қайтарди. «Тоттенҳэм» сўнгги тур олдидан иккинчи ўринни эгаллаган ҳолда икки очколик фарқ билан «Арсенал»ни ортда қолдиратёган эди.
Аммо буларнинг барчаси аҳамиятга эга эмас. Умуман, мутлақо муҳим эмас. «Чемпионат» нашри мазкур учрашувнинг танаффус вақтида рўй берган муҳим ҳодиса ҳақида ҳикоя қилиб берди.
8 май куни «Уайт Харт Лейн» стадионида юз берган энг муҳим воқеа танаффус вақтида содир бўлди. 8 ёшли Маршалл Жэнсон «Тоттенҳэм»нинг захира ўйинчилари билан футбол ўйнади. Болакайнинг на оёқлари ва на қўллари бор.
Шунга қарамай, у футбол ўйнашни ёқтиради. Маршалл атиги бир яшарлигида менингит хасталиги туфайли унинг иккала қўли ва оёқлари ампутация қилинган эди. Аммо болакай ва унинг ота-онаси таслим бўлмади. «Маршалл уни бахтсиз ва маҳкум деб ҳисоблашларини ёмон кўради. У жуда бахтли бола! Ҳа, унинг танаси бошқаларникига ўхшаш эмас. Лекин у ҳаётдан завқ олишни билади», – дейди болакайнинг 36 ёшли онаси Стефани.
Болакай 2012 йилнинг март ойидан бошлаб Англияда шуҳрат қозона бошлади. Айнан ўша йили унинг оиласи Facebook’да Handstand The Appeal For Marshall Janson гуруҳини яратди. Унда Маршаллнинг машҳур инсонлар билан учрашуви ва турли шоулардаги иштирокидан фотосуратлари жойланиши билан биргаликда, энг асосийси, унинг даволаниши учун маблағ йиғилади. Болакайнинг бахтига унинг мияси жароҳатланмаган. Аммо Жэнсонга ҳар йили, у 18 ёшга тўлгунига қадар янги қўл ва оёқ протезлари керак бўлади. Бу ғалати эшитилиши мумкин, бироқ бу ҳақиқат. Бунинг учун ҳар йили 50–60 минг фунт стерлинг зарур.
Маршаллнинг даъволаниши учун пулни доим излашади ва бу жараён муваффақиятли бўлади. Жэнсонга оддий ва «ғайриоддий» инсонлар ёрдам қўлини чўзади. Масалан, 2 йил аввал америкалик қоидасиз жанглар курашчиси, актёр, тадбиркор Халк Хоган болакайнинг даволаниши учун 500 минг доллар ҳадя қилди.
Мана тўрт йилдирки бутун Буюк Британия Маршаллнинг жон сақлаб юришини кузатмоқда – аниқроғи, унинг доимо футбол ўйнаб, тўлақонли ҳаёт кечираётганини. Бир вақтлар Женсонлар оиласига яқин инсонлардан бири Маршаллнинг «Тоттенҳэм» футболкасида футбол ўйнаб гол урган ва чиройли рақс билан нишонлаган вазиятини видеога олиб, уни ижтимоий тармоққа жойлади.
Бир неча ой ўтиб, «шпорлар» Маршаллнинг орзусини рўёбга чиқарди – у «Уайт Харт Лейн» стадионига қадам босди. Шунчаки эмас, балки севимли жамоаси бўлган «Тоттенҳэм» футболчилари Насер Шадли, Том Кэрролл ва бошқалар билан чигалёзди машқларини ўтказди.
Болакай ҳақиқий суперюлдуз сифатида кутиб олинди. Аввалига Жэнсон майдон четида интервью берди.
— Маршалл, бу ерда сенинг ҳамма дўстларинг йиғилган. 36 минг мухлис сени қўллаб-қувватлаяпти, ўзингни қандай ҳис қиляпсан?
– Awesome! (Ажойиб! – «Дарё» таржимаси) – болакайнинг жавоби стадион мухлисларининг олқишлари ичига шўнғиб кетди.
Жэнсонни майдонга Муса Дембеле олиб чиқди. «Ростини айтганда, қийинчилик билан кўз ёшларимни ушлаб тургандим. Бундай инсонларни кўрганингда, сенинг характеринг бир тийинга қиммат эканини тушуниб етасан. Чунки бу болакай бизлардан анча кучли, ҳар биримиздан яхшироқ. У ҳақиқий қаҳрамон!», – деди болакайнинг ҳаётидан таъсирланган бельгиялик ярим ҳимоячи.
Маршаллнинг ҳар бир ҳаракатини майдон сухандони шарҳлаб борди. «Дэвисга аниқ узатма! Қандай техника, қандай тўп назорати! Маршаллнинг идеал пасига назар ташланг! Фантастика, шунчаки фантастика», – мана шу овозлар остида футбол маҳоратини кўрсатди болакай.
«Мен кучли ҳаяжонда эдим. Биласизми, Англия Премьер-лигаси учун ясалган тўплар катта, оғир... Лекин, ўз ишимни уддалай олдим, деб ўйлайман», – деди Маршалл.
«Уайт Харт Лейн» стадионида ўтказилган бир неча ажойиб соатлар ичида Жэнсон нафақат тўп билан ўйнади, балки бир нечта фойдали ишларни ҳам амалга оширди. «Мен шунча дастхатлар олдимки... Баъзи футболчилар протезларимга ўз имзосини туширди! Ҳа айтгандек, биринчи бўлиб олдимга Маурисио Почеттино («Тоттенҳэм» бош мураббийи – «Дарё» изоҳи) келди. У мени қучоқлаб, ўпиб қўйди. Мен эса, ниҳоят, унинг фамилиясини тўғри талаффуз қилишни ўрганиб олдим!», – деди Маршалл.
Маршалл учун ҳаётидаги энг яхши кунни ташкил қилиб берган «Тоттенҳэм» клуби бу билан тўхтаб қолмади. Болакай жамоа базасига таклиф қилинди.
У ўзининг синглиси Лекси ва яна иккита болакай билан севимли жамоасининг машғулотини кузатибгина қолмай, бевосита ўзи ҳам унда иштирок этди. Маршалл бирин-кетин голлар кирита бошлади, унинг дриблингларига на Ян Вертонген ва на Тоби Алдервейрелд қаршилик кўрсата олди.
«Бу болакайдан тўпни олишнинг имкони йўқ! У Эден Азар («Челси» ярим ҳимоячиси – «Дарё» изоҳи)дан маҳоратлироқ!», – деб маълум қилди «ҳаётидаги энг қийин машғулотлардан бирини» ўтказган Вертонген.
Изоҳ (0)